धोकादायक इमारतीचे नळजोडणी खंडित

भिवंडी, ता. १६ (बातमीदार) : भिवंडी महापालिका प्रशासनाने प्रभाग समिती क्रमांक १ अंतर्गत शाळा क्रमांक ७०च्या मागे असलेल्या घर क्रमांक १४९२ चे वीज आणि नळजोडणी खंडित केली आहे. यासह इमारत पाडण्याची प्रक्रिया सुरू करण्यात आली आहे.
शहरातील जीर्ण इमारत नागरिकांसाठी धोकादायक असल्याने प्रथम या इमारतीचे वीज आणि नळजोडणी तोडण्यात आले. यानंतर पाडण्याचे काम सुरू करण्यात आले. कारवाईदरम्यान कोणताही गोंधळ होऊ नये, म्हणून पुरेसा पोलिस बंदोबस्त तैनात केला होता. यासोबतच धोकादायक आणि मोडकळीस आलेल्या इमारतींवर नियमित कारवाई केली जात असल्याचे सहाय्यक आयुक्त मकसूम शेख यांनी सांगितले. नागरिकांच्या सुरक्षेला प्राधान्य देऊन अशा इमारती पाडल्या जात आहेत. पालिका प्रशासक तथा आयुक्त अनमोल सागर, अतिरिक्त आयुक्त विठ्ठल डाके आणि अतिक्रमण उपायुक्त विक्रम दराडे यांच्या मार्गदर्शनाखाली ही कारवाई करण्यात आली. अतिक्रमण विभाग, बीट निरीक्षक, टोरेंट पॉवर आणि पाणीपुरवठा विभागाचे कर्मचारी, स्थानिक पोलिस दलाच्या उपस्थितीत ही कारवाई करण्यात आली.