म्हारळ गावात बेकायदा उत्खनन

म्हारळ गावात बेकायदा उत्खनन
कल्याण, ता. १६ (वार्ताहर) : कल्याण-मुरबाड रस्त्यालगत असलेल्या म्हारळ गावात एका विकसकाने बेकायदा माती उत्खनन केल्याची तक्रार स्थानिक नागरिक प्रकाश साळवे यांनी ठाणे जिल्हाधिकारी आणि कोकण विभागीय आयुक्तांकडे केली आहे. तलाठ्यांनी केलेल्या स्थळ पाहणी अहवालात तफावत आहे. त्याचबरोबर साळवे यांना माहिती अधिकारात दिलेली माहितीदेखील दिशाभूल करणारी आहे. त्यामुळे या प्रकरणात अनियमितता आढळल्याचा आरोप करीत चौकशी करून विकसकाने बुडविलेला सरकारी महसूल वसूल करण्यात यावा. संबंधित अधिकाऱ्यांविरोधात कारवाई करण्यात यावी, अशी मागणी साळवे यांनी केली आहे.

स्थानिक नागरिक प्रकाश साळवे यांनी सांगितले, की म्हारळ गावात एका बिल्डरने माती उत्खनन करण्याची परवानगी न घेता उत्खनन केले आहे. याची तक्रार तलाठी अश्विनी बोरसे यांच्याकडे केली आहे. २३ मे रोजी बोरसे यांनी स्थळ पाहणी केली. त्यानंतर पुन्हा २ जून रोजी पाहणी करून त्या ठिकाणी तीन हजार ब्रास मातीचे उत्खनन झाल्याचा अहवाल दिला. त्यानंतर तहसीलदारांना दिलेल्या अहवालात १,१०० ब्रास मातीचे उत्खनन झाल्याचे म्हटले आहे. या माहितीत तफावत आहे. याप्रकरणी साळवे यांनी माहिती अधिकारात माहिती विचारली असता त्यांना दिशाभूल करणारी माहिती देण्यात आली आहे. त्याचबरोबर माहिती लपविण्याचा प्रकार करण्यात आला असल्याचे साळवे यांनी सांगितले आहे.

फेर पाहणी करणार
दरम्यान, याबाबत कल्याण तहसीलदार सचिन शेजाळ यांच्याकडे विचारणा केली असता त्यांनी सांगितले, की नायब तहसीलदार मंडळ आधिकारी, तलाठी यांचे पथक या तक्रारीनुसार पाठविणार आहे. फेर पाहणीअंती अनियमिता आढळल्यास दंडात्मक कारवाई केली जाईल.