चारफाटा पीरवाडी रस्ता खड्ड्यांच्या विळख्यात

चार फाटा पिरवाडी रस्ता खड्ड्यांच्या विळख्यात
उरण, ता. १६ (वार्ताहर) ः चार फाटा ते पिरवाडी मार्गावर रस्त्याचा दर्जा नसल्याने ठिकठिकाणी खड्डे निर्माण झाले आहेत. त्यामुळे रस्ता खड्ड्याच्या विळख्यात सापडला आहे. या मार्गावरील खड्डे दुरुस्त करण्याची मागणी नागरिकांच्या वतीने करण्यात येत आहे.
चार फाटा ते पिरवाडी मार्गावर मोठ्या प्रमाणात रहदारी असते. पनवेल, नवी मुंबई, ठाणे या परिसरातून पिरवाडी बीच समुद्रकिनारी अनेक पर्यटक या मार्गाचा वापर करून येतात. तसेच नागावात जाण्यासाठीसुद्धा याच मार्गाचा वापर केला जातो. या मुख्य रस्त्यावर ओएनजीसीसारखा केंद्रीय प्रकल्प आहे. या कंपनीमध्ये जाणारे अनेक कामगारांना खड्ड्यांचा नाहक त्रास सहन करावा लागतो.
काही महिन्यांपूर्वीच पिरवाडी समुद्राकडे जाणारा रस्ता नव्याने बनविण्यात आला होता, मात्र हा रस्ता बनविताना ठेकेदारांनी रस्ता निकृष्ट दर्जाचा बनविल्याने या मार्गांवर मोठंमोठे खड्डे निर्माण झाले आहे. हे खड्डे त्वरित दुरुस्त करावेत, अशी मागणी जोर धरत आहे.

डागडुजीबाबत ओएनजीसीला पत्र देणार
चार फाटा ते पिरवाडी मार्ग जिल्हा परिषदेच्या ताब्यात आहे, परंतु सुरक्षेचे कारण पुढे करीत या मार्गाची डागडुजी ओएनजीसीकडून केली जात आहे. या खड्ड्यांच्या डागडुजीबाबत आमच्याकडून ओएनजीसीला पत्र दिले जाईल, असे जिल्हा परिषदचे उपअभियंता आर. एस. देवांग यांनी सांगितले आहे.