नवी मुंबई परिवहन बसला गळती

नवी मुंबई परिवहन बसला गळती
प्रवाशांनी व्यक्त केला संताप
जुईनगर, ता. १६ (बातमीदार) : सध्या मे महिन्यापासून पावसाने चांगलाच धुमाकूळ घातला असून, गेले दोन दिवस शहरात पावसाचा जोर पाहायला मिळाला. यात नवी मुंबई महापालिका परिवहन विभागाच्या बसला गळती लागल्याने प्रवाशांनी संताप व्यक्त केला.
प्रशासनाने वातानुकूलित बस प्रवाशांना दिल्या खऱ्या, पण त्यात गळती होत असल्याने प्रवास करताना प्रवाशांचे प्रचंड हाल झालेले पाहायला मिळाले. हातात छत्री अथवा इतर सामान धरून प्रवासी भिजण्यापासून वाचण्याचा प्रयत्न करत होते, तर बसमध्ये बसण्यासाठी जागा शोधत असलेल्या लोकांना ओल्या आसनांमुळे बसता न आल्याने प्रवाशांनी खंत व्यक्त केली आहे. यामुळे ज्येष्ठ, महिलावर्गाला नाहक त्रासाला सामोरे जावे लागले.
सोमवार (ता. १४) सीवूड येथील तांडेल मैदानातून नेरूळ भगत शाळा बस थांब्याकडे येण्यासाठी २० क्रमांकाची बस पकडली होती, मात्र या बसमध्ये पाणीगळती सुरू होती. संपूर्ण प्रवासात पाऊस असल्याने गाडीत बसण्याच्या आसनावर आणि रिकाम्या जागेतदेखील पाणी पडत होते. अगदी पाण्याची धार नसली तरी घराच्या छतांप्रमाणे पाणी टिपकत होते, असे प्रवासी वंदना खाडे यांनी सांगितले.

जुन्या झालेल्या काही बसमध्ये पाणीगळती होत असल्याचे लक्षात आले आहे, मात्र बसगळतीची तक्रार असल्यास त्वरित बस दुरुस्त करून घेतली जाते. त्यानंतरच ती मार्गावर पाठवण्यात येते. याबाबत त्वरित माहिती घेऊन बसची पाहणी करून गळती असल्यास दूर करण्यात येईल.
- योगेश कडुसकर, परिवहन व्यवस्थापक