मालवणीत घराची भिंत कोसळून नऊ जखमी

मालवणीत घराची भिंत
कोसळून नऊ जखमी

मालाड, ता. १६ (बातमीदार) : मालवणी गेट क्रमांक ६ येथील नवीन कलेक्टर कम्पाउंडमध्ये मंगळवारी (ता. १५) मध्यरात्री दोनमजली घराची भिंत आजूबाजूच्या घरांवर कोसळून नऊ जण जखमी झाले. यात एकाच कुटुंबातील पाच जणांचा समावेश असून, गर्भवती महिलेसह तिघे गंभीर जखमी आहेत. त्यांना कांदिवली येथील डॉ. बाबासाहेब आंबेडकर रुग्णालयात दाखल करण्यात आले आहे.

दोन चिमुकल्यांसह सहा जणांना किरकोळ दुखापत झाली होती. त्यांना प्राथमिक उपचार करून घरी पाठवण्यात आले. सर्वजण झोपेत असताना ही घटना घडली. शेजाऱ्यांनी तत्परता दाखवून ढिगाऱ्याखाली अडकलेल्या लोकांना बाहेर काढून रुग्णालयात दाखल केले. दरम्यान, पोलिस आणि अग्निशमन दल काही वेळात घटनास्थळी पोहोचून त्यांनी मदतकार्य सुरू केले. दरम्यान, मालवणी परिसरात याआधीही अशा दुर्घटना घडल्या असून, २०१३मध्ये गेट क्रमांक ७ येथे तीनमजली घर कोसळून १३ जणांचा मृत्यू झाला होता.