पालघरमधील २० हजार विद्यार्थ्यांचा लाल परीतून सुरक्षित प्रवास

मनोर, ता. १६ (बातमीदार) : ग्रामीण भागातील विद्यार्थ्यांच्या सुरक्षित प्रवासासाठी राज्य परिवहन मंडळाकडून पुण्यश्लोक अहिल्यादेवी होळकर आणि मानव विकास योजनेअंतर्गत पालघर जिल्ह्यातील २० हजारांपेक्षा अधिक विद्यार्थ्यांना शाळा, महाविद्यालयापर्यंतच्या प्रवासासाठी एसटी बस पासचे वितरण करण्यात आले आहे. एसटी महामंडळाच्या अधिकाऱ्यांनी थेट शाळा, महाविद्यालयात जाऊन पासचे वितरण विद्यार्थ्यांमध्ये केले आहे. शाळांमध्ये पास मिळाल्यामुळे बस आगारामध्ये लागणाऱ्या रांगांपासून मुक्ती मिळाली आहे.

राज्य सरकारच्या पुण्यश्लोक अहिल्यादेवी होळकर योजनेअंतर्गत बारावीमध्ये शिक्षण घेत असलेल्या १५,६४३ विद्यार्थिनींना पूर्णपणे मोफत पास देण्यात आले आहेत. मानव विकास योजने अंतर्गत दोन हजार ५४७ विद्यार्थिनींना मोफत पास देण्यात आले आहेत. याव्यतिरिक्त तीन हजार ६४५ विद्यार्थ्यांना ६६ टक्के सवलत असलेले पास देण्यात आले आहेत. पासमुळे एक तृतीयांश रक्कम भरून घरापासून शाळेपर्यंतचा प्रवास मुले करू शकत आहेत. एसटी महामंडळाच्या अधिकाऱ्यांनी शाळेत पोहोचून विद्यार्थ्यांना पास वितरित केले आहेत.

शाळेत पास वितरित
आता विद्यार्थ्यांना पास काढण्यासाठी बस आगाराच्या फेऱ्या मारण्याची गरज उरली नाही. एसटी महामंडळाकडून शाळेने दिलेल्या माहितीनुसार तयार केलेले पास सरळ वर्गात पोहोचवले जात असल्यामुळे विद्यार्थ्यांचा वेळ वाचला. तसेच अभ्यास वेळ उपलब्ध होत आहे. सरकारच्या उपक्रमामुळे विद्यार्थ्यांना शाळेत पोहोचण्याचा मार्ग सोपा आणि सुरक्षित झाला आहे. पूर्वी पास काढणे कठीण आणि वेळखाऊ असलेली प्रक्रिया सोपी आणि विद्यार्थ्यांसाठी अनुकूल ठरत आहे.

फेरी रद्द न करण्याचा निर्णय
आदिवासीबहुल आणि दुर्गम भागात वास्तव्य करणाऱ्या विद्यार्थ्यांना एसटी बस एकमात्र पर्याय आहे. परिवहन विभागाच्या मंत्र्यांनी कोणतीही शैक्षणिक बस फेरी रद्द न करण्याचे निर्देश एसटी महामंडळाला दिले आहेत.

राज्य परिवहन महामंडळाच्या पुण्यश्लोक अहिल्याबाई होळकर योजनेअंतर्गत पाचवी ते बारावीपर्यंतच्या, तसेच मानव विकास योजनेअंतर्गत विद्यार्थिनींना शाळेत येण्या-जाण्यासाठी मोफत पास दिले जात आहेत. सुरक्षित प्रवासासाठी विद्यार्थ्यांनी एसटी महामंडळाच्या मोफत पास सुविधेचा लाभ घेतला पाहिजे.
- कैलास पाटील, विभाग नियंत्रक, राज्य परिवहन महामंडल, पालघर विभाग