ठेकेदारांमुळे राजकीय दबाव

ठेकेदारांमुळे राजकीय दबाव
त्रस्त अभियंत्यांचे पालिका आयुक्तांना निवेदन
सकाळ वृत्तसेवा
ठाणे, ता. १६ : सेवानिवृत्त होणाऱ्या अधिकारी-कर्मचाऱ्यांची वाढती संख्या, तसेच गेल्या अनेक वर्षांपासून रखडलेली भरती प्रक्रिया यामुळे अभियंत्यांची पदे रिक्त झाली आहेत. त्यामुळे कार्यरत असलेल्या अभियंत्यांवर ताण वाढत आहे. त्याचा परिणाम थेट त्यांच्या आरोग्यावर होऊ लागला आहे. अशातच दुसरीकडे अभियंत्यांवर वाढत असलेल्या तणावाबाबत थेट महापालिका आयुक्तांनाच निवेदन दिले आहे. या निवेदनात कामाच्या ठिकाणी राजकीय दबाव असलेल्या ठेकेदारांकडून त्रासाला सामोरे जावे लागत आहे, ही बाब नमूद केली आहे. त्यामुळे पालिकेत चर्चेला उधाण आले आहे.

ठाणे शहरातील विविध प्रकल्पांची आखणी करून त्याचा आराखडा व अंमलबजावणी करण्याची जबाबदारी ठाणे पालिकेच्या सार्वजनिक बांधकाम विभागातील अभियंत्यांवर असते; मात्र पालिका आस्थापनेवर ३०० अभियंत्यांची पदे मंजूर असताना, १६४ पदे रिक्त असल्याची गंभीर बाब समोर आली. यासंदर्भातील वृत्त प्रसिद्ध झाल्यानंतर आता या अभियंत्यांनी आपल्या व्यथा लेखी मांडल्या आहेत. त्या समस्यांचे निवेदन थेट पालिका आयुक्तांना दिले आहे. तसेच कमी अभियंत्यांमुळे अतिरिक्त कामाचा ताण वाढत असल्याने नव्याने अभियंत्यांची भरती प्रक्रिया तत्काळ राबवावी, अशी विनंती केली आहे.

अनेक अभियंत्यांच्या मागील १० ते १५ वर्षांपासून बदल्या झालेल्या नाहीत. त्यामुळे एकाच ठिकाणी जास्त काळ कामे करून स्थानिकांचा रोष निर्माण होतो. तसेच काही अभियंते शहराच्या वेगवेगळ्या प्रभागातील वेगवेगळी कामे एकाच वेळी करतात, जी तांत्रिकदृष्ट्या करणे शक्य नाही. त्यामुळे मानसिक ताण वाढत असल्याचेही त्यांनी निवेदनात नमूद केले आहे. त्यामुळे अभियंत्यांच्या बदल्या व्हाव्यात, अशी मागणीही केली आहे. तसेच अपंग संवर्ग अथवा इतर संवर्गात एखाद्या दुसऱ्या पदांवर जी भरती प्रक्रिया राबविली आहे. त्या भरती प्रक्रियेत खास मर्जीतील व विशिष्ट उमेदवाराला प्राधान्य देण्यासाठी केल्याचा म्हणत त्याची चौकशी करण्याची मागणी अभियंत्यांनी निवेदनाद्वारे केली.

निवेदनाद्वारे मागण्या
अनेक अभियंत्यांना अनेक अतांत्रिक कामे करावी लागत आहेत. त्यात गणपती विसर्जन, इतर परीक्षांवर देखरेख, फेरीवाल्यांवर कारवाई करताना उपस्थिती आदींसह इतर कामेदेखील करावी लागत आहेत. त्या कामातून मोकळीक मिळावी, अभियंता संवर्गातील उपनगर अभियंता, कार्यकारी अभियंता, उपअभियंता या संवर्गातील पदोन्नतीने १९ पदे कित्येक महिन्यांपासून रिक्त असून, ती भरली जावीत, पदोन्नती मिळावी, कामाची विभागणी ही समप्रमाणात करावी. प्रभागातील व प्रकल्पांच्या कामांची विभागणी करावी, १० ते १२ वर्षांपूर्वी महापालिकेत इस्टेमेंट मॅनेजमेंट अस्तित्वात होता. त्यामुळे कामाचे दरांमध्ये अंदाजखर्चात सुसूत्रीकरण केले जात असे व एकच काम पुन्हा होत नसे. त्यामुळे महापालिकेच्या पैशांची बचत होत होती. तसेच ती कामे दायित्वात प्रस्तावित केली जात नसत. त्यामुळे पुन्हा हा सेल सुरू करावा, अशी मागणीही केली आहे.

अशी आहेत रिक्त पदे
ठाणे महापालिकेत ३०० मंजूर पदांपैकी १६४ पदे रिक्त आहेत. केवळ १३२ पदांवर अभियंते कार्यरत आहेत. यामध्ये कनिष्ठ अभियंता (१) या संवर्गातील मंजूर १२६ पदांपैकी ४६ पदे कार्यरत असून, ८० पदे रिक्त आहेत. कनिष्ठ (२) या संवर्गातील मंजूर ६८ पदांपैकी दोन पदे कार्यरत असून, ६६ पदे रिक्त आहेत.