बहिणीच्या गैरहजेरीतच फोडले घर

उल्हासनगर, ता. १६ (वार्ताहर) : रक्ताच्या नात्यांनाही काळिमा फासणारी धक्कादायक घटना उल्हासनगरमध्ये घडली आहे. येथे मावस भावानेच आपल्या बहिणीच्या घरात घुसून तब्बल नऊ लाख रुपयांचे दागिने आणि रोख रक्कम लंपास केली आहे. याप्रकरणी विठ्ठलवाडी पोलिस ठाण्यात गुन्हा दाखल केला असून पोलिसांनी आरोपी शाजू अली याचा शोध सुरू केला आहे.
उल्हासनगर कॅम्प ४ येथील ओटी स्टेशनजवळील अशोका इमारतीत रिना शेट्टी आपल्या कुटुंबासह राहतात. रिना काही कामानिमित्त रविवारी (ता. १३) कल्याणला गेल्या होत्या. त्यांचा लहान मुलगा घरी एकटाच होता. याच दरम्यान, नवी मुंबई येथे राहणारा रिनाचा मावस भाऊ शाजु अचानक घरी आला. बहीण नसल्याचे पाहून त्याने लहान मुलाचे लक्ष दुसरीकडे वळवले आणि कपाटातील आठ लाख ९२ हजार रुपयांचे मंगळसूत्र, अंगठ्या व सोनसाखळी चोरी केली. रिना शेट्टी घरी आल्यानंतर कपाटातील दागिने आणि रोख रक्कम गायब असल्याचे लक्षात आल्यानंतर त्यांनी तत्काळ विठ्ठलवाडी पोलिस ठाण्यात धाव घेतली. दिलेल्या तक्रारीवरून पोलिसांनी शाजूविरोधात गुन्हा दाखल केला आहे. या प्रकरणाचा अधिक तपास विठ्ठलवाडी पोलिस करत आहेत. शाजूचा शोध घेण्यासाठी पोलिसांनी विविध ठिकाणी पथके रवाना केली आहेत. लवकरच त्याला अटक करण्यात येईल, अशी माहिती वरिष्ठ पोलिस निरीक्षक अशोक कोळी यांनी दिली आहे. या प्रकारामुळे नात्यांमधील विश्वासाला तडा गेल्याचे चित्र निर्माण झाले आहे. नागरिकांनी कुणालाही पूर्णतः विश्वासाने घरात प्रवेश देताना काळजी घ्यावी, असा सल्लाही पोलिसांकडून देण्यात येत आहे.