रेन वॉटर हार्वेस्टिंगद्वारे पाणी टंचाईवर मात

रेन वॉटर हार्वेस्टिंगद्वारे पाणीटंचाईवर मात
खारघरमधील अंगण सोसायटीचा प्रकल्प; सौरऊर्जेमुळे बिलात बचत
खारघर, ता. १६ (बातमीदार) : खारघर परिसरात पावसाळ्यातही पाणीटंचाई जाणवत असताना खारघर सेक्टर १९ मधील अंगण सोसायटीच्या सदस्यांनी एकत्र येऊन सोसायटीत रेन वॉटर हार्वेस्टिंग प्रकल्प सुरू केला आहे. या प्रकल्‍पाच्या माध्यमातून पाणीटंचाईवर मात केली जात आहे. गेल्या सात वर्षांपासून हा प्रकल्प सुरळीत सुरू असून, रहिवाशांना मुबलक पाणी उपलब्ध होत असल्यामुळे समाधान व्यक्त करण्यात येत आहे.
खारघर परिसरात सिडकोच्या हेटवण धरणातून पाणीपुरवठा केला जात आहे. मात्र गेल्या काही वर्षांपासून खारघर परिसरात कमी दाबाने पाणीपुरवठा होत असल्यामुळे टँकरचा आधार घ्यावा लागत आहे. सोसायटीत कमी दाबाने होणारा पाणीपुरवठा आणि त्यामुळे होणारे वाद टाळण्यासाठी सोसायटीने रेन वॉटर हार्वेस्टिंग प्रकल्‍पाला प्राधान्य दिले आहे. छतावरून कोसळणारे पाणी अडवून त्याचा रेन वॉटर हार्वेस्टिंगद्वारे टाकीमध्ये साठवून त्याचा उपयोग करता येतो, हे अंगण सोसायटीने दाखवून दिले आहे. जुलै २०१९मध्ये हा प्रकल्प सुरू करण्यात आला. गेल्या सात वर्षांपासून हा प्रकल्प सुरळीत सुरू आहे. पाणी तसेच सोसायटीचा देखभाल योग्यरीतीने व्हावी, यासाठी रहिवासी ब्रिजेश पटेल, संजय पटेल, विजय बगाडिया, अरविंद पटेल आदी पदाधिकारी प्रयत्नशील आहे. विशेष म्हणजे अनेक सोसायटीच्या पदाधिकाऱ्यांनी सोसायटीला भेट देऊन प्रकल्पाची माहिती घेतली आहे.
....................
कोट -
सोसायटीत २५ हजार लिटर क्षमतेची टाकी आहे. छतावर जमा होणारे पाणी पीव्हीसी पाइप आणि फिल्टरची जोडणी करून थेट टाकीत सोडण्यात येत आहे. त्‍यामुळे पावसाळ्यात जमा होणाऱ्या पाण्याचा दैनंदिन उपयोग केला जात आहे. रेन वॉटर हार्वेस्टिंग प्रकल्पामुळे पाणीटंचाईवर मात करण्यात आले असून, पावसाळ्यातील चार महिने पाणीबिल कमी प्रमाणात येत आहे.
- ब्रिजेश पटेल, पदाधिकारी, अंगण सोसायटी
................