नवी मुंबई महापालिकेचा प्रवेशद्वार फलकाविना

नवी मुंबई महापालिकेचा प्रवेशद्वार फलकाविना
वाशी, ता. १७ (बातमीदार) ः नवी मुंबई महापालिकेच्या वतीने ठाणे व नवी मुंबईच्या वेशीवर नवी मुंबई पालिका क्षेत्रामध्ये हद्द सुरू झाल्याचे डिजिटल होर्डिंग पालिकेकडून लावण्यात आले होते, मात्र सुमारे दोन वर्षांपूर्वी वादळी वाऱ्यासह अवकाळी पावसामध्ये हे होर्डिंग पडले होते. त्‍यानंतर आजतागायत या ठिकाणी पालिकेकडून कोणतेही फलक लावण्यात आलेले नाही. त्यामुळे नवी मुंबईचा प्रवेशद्वार हा फलकाविना आहे. त्यामुळे शहराचे प्रवेशद्वार विद्रूप दिसत असल्याचे बोलले जात आहे. त्‍यामुळे पालिकेने या ठिकाणी नव्याने डिजिटल प्रवेशद्वाराचा फलक बसवावा, अशी मागणी माजी स्थायी समिती सभापती नवीन गवते यांनी पालिका आयुक्तांकडे केली आहे.
नवी मुंबई व ठाण्याच्‍या हद्दीमध्ये पूर्वी ठाणे महापालिकेची कमान होती, पण काही वर्षांपूर्वी ठाणे महापालिकेने त्यांची असणारी कमान सुरक्षेच्या कारणास्तव जमीनदोस्त केली. त्यानंतर नवी मुंबई महापालिकेने त्यांच्या हद्दीची सुरुवात दाखवण्यासाठी स्वच्छ भारत अभियानअंतर्गत डिजिटल फलक लावला होता, मात्र दोन वर्षांपूर्वी अवकाळीमुळे पालिकेचा असणारा डिजिटल फलक हा तुटला होता. त्‍यानंतर महपालिकेने पुन्‍हा प्रवेशद्वारावर फलक लावण्याची तसदी घेतली नाही. या रिकाम्या जागेवर राजकीय नेत्‍यांकडून अनधिकृत होर्डिंगबाजी सुरू झाली आहे, मात्र याकडे पालिकेचे दुर्लक्ष होत आहे. त्‍यामुळे पालिकेने या ठिकाणी डिजिटल फलक बसवावा, अशी मागणी वाहनचालकांकडून करण्यात येत आहे.
.........................
नवी मुंबई महापालिकेच्या प्रवेशद्वारावर असणारा डिजिटल फलक दोन वर्षांपूर्वी वादळात पडला आहे. त्‍यानंतर पालिकेकडून दोन वर्षांत या ठिकाणी डिजिटल फलक बसविण्यात आलेला नाही. या ठिकाणी नवी मुंबईचे प्रवेशद्वार असणारा फलक पालिकेकडून बसविण्यात यावा यासाठी पालिका आयुक्तांकडे मागणी केली आहे.
-नवीन गवते, माजी स्थायी समिती सभापती, नवी मुंबई महापालिका