भिवंडीत भटक्या कुत्र्यांची दहशत

भिवंडीत भटक्या कुत्र्यांची दहशत
सहा महिन्यांत सहा हजार श्र्वानदंश
भिवंडी, ता. १६ (वार्ताहर) : शहरात श्वानदंशाचे प्रकार मोठ्या प्रमाणात वाढले आहेत. मागील सहा महिन्यांत शहरात सहा हजारांहून अधिक नागरिकांना श्वानदंश झाला असल्याची माहिती उपजिल्हा रुग्णालयाने दिली.
गेल्या काही दिवसांपासून शहरात भटक्या कुत्र्यांनी हैदोस घातला आहे. दोन दिवसांपूर्वी शहरातील दर्गा रोड परिसरात पिसाळलेल्या कुत्र्याने एकाच दिवशी परिसरातील ११ जणांचा चावा घेतला. यापैकी एक इमारतीमध्ये उभ्या असलेल्या व्यक्तीवर कुत्र्याने हल्ला केला. ही घटना सीसीटीव्हीमध्ये कैद झाली असून, भटक्या कुत्र्यांचा प्रश्न पुन्हा एकदा ऐरणीवर आला आहे.
उपजिल्हा रुग्णालयाच्या आकडेवारीवरून भिवंडीत जानेवारी महिन्यात १,०६६, फेब्रुवारी १,०४२, मार्च १,१०४, एप्रिल ९८८, मे १,०००, जून ६८९ व १५ जुलै २०२५ या १५ दिवसांमध्ये ३६१ असे सहा महिन्यांत एकूण ६,२५० श्वानदंश झाल्याच्या घटना समोर आल्या आहेत.
--------------------------------------
हैदराबादच्या संस्थेला ठेका
मागील वर्षीसुद्धा शहरात भटक्या कुत्र्यांचा वावर वाढल्याने तत्कालीन आयुक्त अजय वैद्य यांनी १२ वर्षे बंद असलेले श्वान निर्बीजीकरण केंद्र ११ नोव्हेंबर २०२४ पासून पुन्हा सुरू केले आहे. हैदराबादच्या ‘वेट्स सोसायटी फॉर ॲनिमल वेल्फेअर असोसिएशन’ या संस्थेला पाच वर्षांसाठी या कामाचा ठेका देण्यात आला आहे. या संस्थेस प्रति श्वान निर्बीजीकरण करण्यासाठी १,४५० रुपये दिले जात आहेत. ११ नोव्हेंबर २०२४ ते १५ जुलै २०२५ या काळात शहरातील एकूण ३,२७५ श्वानांवर निर्बीजीकरण व रेबिज प्रतिबंधक लस देण्यात आली असल्याची माहिती स्वच्छता विभागाचे प्रमुख फैजल तातली यांनी दिली.