वज्रेश्वरी-शिरसाड रस्त्यावर अपघातात एकाचा मृत्यू

वज्रेश्वरी-शिरसाड रस्त्यावर अपघातात एकाचा मृत्यू

वज्रेश्वरी, ता. १६ (बातमीदार) : वज्रेश्वरी-शिरसाड मार्गावरील मांडवी येथे एका दुचाकीस्वाराचा अपघातात जागीच मृत्यू झाला. भरत बुजड (वय ३०, रा. भिनार, बुजडपाडा) असे या या तरुणाचे नाव होते. तो सकाळी वसई येथे कामावर जात असताना खड्डे चुकवताना समोरून आलेल्या डम्परचा धक्का लागून हा अपघात झाला.
शिरसाड-वज्रेश्वरी या रस्त्याची अवस्था अत्यंत बिकट झाली आहे. पावसामुळे रस्त्याची झालेली झीज व त्यामुळे रस्त्यावर पडलेले खड्डे यामुळे अपघाताचा धोका मोठ्या पटीने वाढला आहे. शिवसेना (ठाकरे गट) पक्षाने रास्ता रोको आंदोलनाचा इशारा दिल्यानंतर सार्वजनिक बांधकाम विभागाने या रस्त्यावरील खड्डे बुजवले होते. दरम्यान, पुन्हा खड्डे पडले असून, त्याचा वाहनचालकांना फटका बसत आहे. मांडवी ते शिरवलीपर्यंत या रस्त्याची अक्षरशः चाळण झाली आहे. हा रस्ता तत्काळ दुरुस्त करावा, अशी मागणी नागरिकांनी केली आहे. अपघाताबाबत मांडवी पोलिस ठाण्यात गुन्हा दाखल करण्यात आला आहे.