बचत गटांसाठी हक्काची बाजारपेठ

बचत गटांसाठी हक्काची बाजारपेठ
अंबरनाथमध्ये उभा राहणार मॉल
सकाळ वृत्तसेवा
ठाणे, ता. १६ : महालक्ष्मी सरस, कोकण विभागीय सरस प्रदर्शनाअंतर्गत राज्य व कोकण विभागातील बचत गटांना त्यांनी उत्पादित केलेल्या वस्तू विक्रीसाठी बाजारपेठ उपलब्ध करून देण्यात येत असते; मात्र त्यांना कायमस्वरूपी बाजारपेठ उपलब्ध व्हावी, यासाठी ठाणे जिल्हा परिषदेच्या माध्यमातून हालचाली सुरू केल्या आहेत. त्यानुसार अंबरनाथ तालुक्यातील बेलवली येथे मॉल उभारण्याबाबत प्रस्ताव सरकारकडे पाठविण्यात येणार आहे. यासाठी वास्तुविशारदची नेमणूक करण्याची प्रक्रिया सुरू केल्याची माहिती सूत्रांनी दिली.

ग्रामीण भागातील महिलांच्या सक्षमीकरणासाठी आणि त्यांनी उत्पादित केलेल्या विविध वस्तूंना बाजारपेठ उपलब्ध व्हावी, यासाठी जिल्हा ग्रामीण विकास यंत्रणा, ठाणे आणि महाराष्ट्र राज्य ग्रामीण जीवनोन्नती अभियान यांच्या संयुक्त विद्यमाने ‘विभागीय, जिल्हास्तरीय व मिनी सरस विक्री प्रदर्शन’ आयोजित करण्यात येते. या प्रदर्शन विक्रीच्या माध्यमातून महिला बचत गटांना बाजारपेठ उपलब्ध करून देण्याचा प्रयत्न करण्यात येतो; मात्र या महिला बचत गटांना कायमस्वरूपी हक्काची जागा उपलब्ध व्हवी, यासाठी ग्रामविकास विभागाने पावले उचलण्यास सुरुवात केली आहे. तसेच बचत गटांसाठी मॉल उभारण्यासाठी प्रस्ताव पाठविण्याच्या सूचना केल्या होत्या. त्यानुसार ठाणे जिल्हा परिषदेच्या जिल्हा ग्रामीण विकास यंत्रणेच्या माध्यमातून अंबरनाथ तालुक्यातील बेलवली येथील जागा निश्चित केली आहे.

जिल्ह्यात १० हजार ८०० बचत गट
ठाणे जिल्ह्यातील १० हजार ८०० महिला बचत गट असून, प्रत्येक गटात १० ते १९ महिला सहभागी आहेत. त्याचा विचार करता आजच्या घडीला जिल्ह्यातील ग्रामीण भागातील सुमारे एक लाख १७ हजार महिला जोडल्या आहेत. त्यामुळे प्रत्येक घरातील महिला बचत गटाला जोडली गेल्याचा दावा जिल्हा प्रशासनाने केला आहे.

कुटुंबाला लावतात हातभार
ठाणे जिल्ह्यात ग्रामीण विकास यंत्रणेच्या माध्यमातून बचत गटाची चळवळ उभी केली आहे. या चळवळीच्या माध्यमातून महिला या स्वतःचा संसार सांभाळून पुन्हा, बचत गटाच्या माध्यमातून बचत करताहेत, उत्पादन करताहेत, विक्री करताहेत आणि स्वतःच्या कुटुंबाला हातभार लावत असल्याची माहिती यंत्रणेकडून देण्यात आली.

सरसमधून लाखोंची उलाढाल
मागील वर्षी जिल्हा ग्रामीण विकास यंत्रणा, ठाणे आणि महाराष्ट्र राज्य ग्रामीण जीवनोन्नती अभियान यांच्या संयुक्त विद्यमाने विभागीय, जिल्हास्तरीय व मिनी सरस विक्री प्रदर्शन ठाण्यातील गावदेवी मैदान येथे आयोजित केले होते. या वेळी १८८ महिला बचत गटांनी सहभाग नोंदविला होता, तर या प्रदर्शन व विक्रीतून ६७ लाखांची उलाढाल झाली असल्याची माहिती सूत्रांनी दिली.