तुलिंज पोलिस ठाण्यात दोन गटांत मारहाण

तुळिंज पोलिस ठाण्यात दोन गटांत मारहाण

नालासोपारा, ता. १६ ( बातमीदार) : पूर्वेतील तुळिंज पोलिस ठाण्यात दोन गटांत फ्रीस्टाइल हाणामारी झाल्याप्रकरणी दोन्ही गटांवर पोलिसांनी गुन्हा दाखल केला आहे. सोसायटीमधील पाण्याच्या वादावरून दोन्ही गट एकमेकांवर गुन्हा दाखल करण्यासाठी आले असता ठाणे अंमलदारांच्या समोरच त्यांनी हाणामारी केल्याची घटना मंगळवारी (ता. १५) दुपारी साडेचारच्या सुमारास घडली. या मारहाणीचा व्हिडिओ आज दिवसभर व्हायरल झाल्यावर सात जणांवर गुन्हा दाखल करण्यात आला. पोलिस ठाण्यातच हाणामारी झाल्याने समाजात उलटसुलट चर्चेला उधाण आले आहे.
नालासोपारा पूर्व नील गगन अपार्टमेंट या इमारतीमधील दोन रहिवाशांमध्ये पाण्यावरून वाद सुरू होता. याच वादाचे रूपांतर वारंवार वादावादीत होत असल्याने दोन्ही रहिवासी गट पोलिस ठाण्यात एकमेकांची तक्रार देण्यासाठी आले होते. ठाणे अंमलदारांसमोर पोलिस ठाण्याच्या आवारात असतानाच पुन्हा त्यांच्यात आपसात वादावादी झाली आणि याचे रूपांतर चक्क तुंबळ हाणामारीत झाले. पोलिसांनी तत्काळ मध्यस्थी करून मारामारी सोडवली. यात दोन्ही गटांनी एकमेकांवर गुन्हे दाखल केले आणि पोलिस ठाण्यात सार्वजनिक ठिकाणी दोन्ही गटाने हाणामारी केल्याप्रकरणी पोलिसांनी स्वतः पुढाकार घेऊन दोन्ही गटांतील सात जणांवर गुन्हा दाखल केला.