इंटरनेटचालकांना पथनाट्यातून जनजागृती

अंबरनाथ, ता. १६ (वार्ताहर) : टाटा पॉवरच्या उच्च दाबाच्या तारा तुटून मोठी दुर्घटना होऊ नये, म्हणून अधिकाऱ्यांनी अंबरनाथमध्ये केबल आणि इंटरनेट सेवा पुरवणाऱ्यांसोबत बैठक घेतली. अंबरनाथ पोलिस ठाण्यात झालेल्या बैठकीत टाटाच्या उच्च दाब विद्युत प्रणाली वाहिनीविषयी जनजागृती करण्यात आली. या वेळी पथनाट्य सादर करून टाटाच्या हायटेन्शन तारापासून केबलचालकांनी सुरक्षेच्या दृष्टीने कोणती काळजी घ्यावी? याविषयी जनजागृती करण्यात आली. केबल व इंटरनेटचालक वाहिनी टाकताना टाटा पॉवरच्या हायटेन्शन तारा जवळून टाकत असताना दुर्घटनेची शक्यता असते. यासाठी टाटाचे अधिकारी विद्याधर नारकर यांनी त्यांना सविस्तर माहिती देऊन मार्गदर्शन केले. दरम्यान यावेळी हायटेन्सन तारांचा केबलला स्पर्श झाल्यास याचा परिणाम वाहतूक सेवा, लोकल, तसेच अन्य महत्त्वांच्या घटकांवर होऊन वीज खंडित होऊ शकते, असे सांगितले. यावेळी साद फाउंडेशनतर्फे जनजागृतीपर पथनाट्य सादर करण्यात आले. बैठकीत अधिकारी विद्याधर नारकर, प्रमोद बुधे, फाउंडेशनचे हेमराज कुराडिया, राजू जयस्वार, सुषमा वाघ; तसेच पोलिस अधिकारी संभाजी काळे, सुभाष खरात, जितेंद्र चव्हाण उपस्थित होते.