अनधिकृत बांधकामांवर कारवाई

अनधिकृत बांधकामांवर कारवाई
टिटवाळा, ता. १७ (वार्ताहर) : शहरात बुधवारी (ता. १६) सकाळी मोठ्या दणक्यात कारवाई झाली. महापालिकेच्या ‘अ’ प्रभाग कार्यालयासह आरटीओ आणि ग्रामीण पोलिसांनी संयुक्तपणे टिटवाळा स्थानक ते गणेशमंदिर रस्ता, निमकर नाक्यापर्यंत अनधिकृत अतिक्रमणांवर एकाच वेळी कारवाई केली. यात फेरीवाल्यांच्या हातगाड्या तोडल्या, टपऱ्या हटवण्यात आल्या. तसेच रस्त्यावरील अडथळा दूर करताना अनधिकृत टपरीधारक, फेरीवाल्यांना प्रशासनाकडून इशारा देण्यात आला.

कारवाईमुळे फेरीवाले पुन्हा बसणार नाहीत, असे चित्र निर्माण केले जाते; मात्र पुन्हा दोन दिवसांनी परिस्थिती जैसे थे अशीच होते. अशी प्रतिक्रिया माजी उपमहापौर सरनोबत यांनी दिली आहे.
वरून आदेश आला की कारवाई होते. थोडे दिवस मोकळा रस्ता होता. नागरिकांचे समाधान होते; मात्र पुन्हा काही दिवसांनी हळूहळू तिथे गाड्या लागतात. शेड उभ्या राहतात. ज्या फेरीवाल्यांना हटवले जाते ते पुन्हा परत कसे येतात, त्यांना जागा कोण देतो, याचे उत्तर पालिकेकडे नसते. हीच खरी शोकांतिका असल्याचेदेखील सरनोबत म्हणाले.

शिवसेनेचे कल्याण उपशहरप्रमुख विजयभाऊ देशेकर म्हणाले की, आजची ही कारवाई समाधानकारक असली तरी कारवाईबरोबरच ठोस उपाययोजना, तसेच यावर दीर्घकालीन उपाय व्हायला हवा. जर खरंच प्रशासन अनधिकृत बांधकामांबाबत गंभीर असेल, तर पर्यायी जागा, कायदेशीर व्यवस्थापन आणि नियमित तपासणीचा आराखडा तयार तयार करायला हवा, तर येथील स्थानिक नागरिक जितु तिवारी म्हणाले की, वरिष्ठ अधिकारी येणार असले की, त्याच्या आधी चार फेरीवाले हटवायचे, फोटो काढायचे आणि कारवाई केल्याचे जाहीर करायचे. हे असे किते दिवस चालणार, यावर काही ठोस उपाययोजना व्हायला हव्यात, अशी संतप्त प्रतिक्रिया दिली.