खड्डे

भिरा फाटा-सुतारवाडी रस्ता उखडला
रस्त्यावर जागोजागी खड्डे अनेक ठिकाणी भेगा

रोहा, ता. १७ (बातमीदार)ः पुणे-ताम्हणी घाटमार्गे जाणारा व मुंबई-गोवा महामार्गाला लागून असलेल्या कोलाड-वरसगाव ते सुतारवाडी हा मुख्य रस्ता १० किलोमीटर अंतराचा आहे, मात्र अवजड वाहनांची सतत वर्दळ असल्याने रस्त्याची दुरवस्था झाली आहे. जागोजागी लहान-मोठे खड्डे पडले असून, काही ठिकाणी भेगाही पडल्‍या आहेत. खड्ड्यातील खडी बाहेर पसरल्‍याने वाहने घसरून अपघात होत आहेत.
भिरा फाट्यावरून सुतारवाडीमार्गे पुणेकडे जाण्यासाठी हा मार्ग जवळचा असल्याने दिवसरात्र वर्दळ सुरू असते. विळे-भागाडदरम्‍यान अनेक कंपन्या आहेत. कंपन्यांमध्ये कच्चा माल ने-आण करण्यासाठी अवजड वाहतूकही सुरू असते. सुतारवाडी परिसरामध्ये अनेक फार्महाउस असल्यामुळे वर्षाचे बाराही महिने मुंबई, पुणे, नागपूर, ठाणे, दिल्ली आदी प्रमुख शहरातील पर्यटक येतात. सततच्या वर्दळीमुळे रस्‍ता उखडला आहे. मध्यंतरी डागडुजी करण्यात आली, मात्र ती निकृष्‍ट दर्जाची असल्‍याने अवघ्‍या काही महिन्यांत रस्‍त्‍याची दैना झाली आहे. त्‍यामुळे सार्वजनिक बांधकाम विभागाने त्‍वरित रस्‍त्‍याची दुरुस्‍ती करावी, अशी मागणी नागरिकांकडून करण्यात येत आहे.

रोहा ः भिरा फाटा ते सुतारवाडी रस्त्यावर खड्डे पडले आहेत.

------------

सावरोली खारपाडा मार्ग खड्ड्यात

खालापूर, ता. १७ (बातमीदार)ः तालुक्यातील महत्त्वाच्या राज्य मार्गापैकी एक असलेला सावरोली-खारपाडा राज्य मार्ग उरणमधील सार्वजनिक बांधकाम विभागाच्या अखत्‍यारीत येतो, मात्र देखभाल-दुरुस्‍तीकडे दुर्लक्ष होत असल्‍याने सावरोली गावाजवळ खड्ड्यांमुळे रस्‍त्‍याची अक्षरशः चाळण झाली आहे. यामुळे वाहनचालकांसह पादचाऱ्यांना जीव मुठीत घेऊन मार्गक्रमण करावे लागते. या मार्गावर मोठ्या प्रमाणात कारखाने आहेत. पाताळगंगा औद्योगिक वसाहत आणि पुढे मुंबई-गोवा महामार्गाला हाच रस्‍ता जोडला जात असल्याने अवजड वाहतूकही मोठ्या प्रमाणात असते. अपघात तसेच मोठी दुर्घटना टाळण्यासाठी रस्‍त्‍याची दुरुस्‍ती करण्यात यावी, अशी मागणी परिसरातील नागरिक तसेच कामगारवर्गाकडून होत आहे.

------------------