महिलेला शिवीगाळ करणाऱ्यांवर गुन्हा दाखल

महिलेला शिवीगाळ केल्याप्रकरणी गुन्हा
भिवंडी, ता. १७ (वार्ताहर) : रिक्षा पार्किंगच्या वादातून रिक्षाचालकाने २६ वर्षीय महिलेशी गैरवर्तन केले. तसेच महिलेला शिवीगाळ करीत तिचा विनयभंग केल्याची घटना तीनबत्ती परिसरात घडली आहे. याप्रकरणी रिक्षाचालकासह चौघांविरोधात शहर पोलिस ठाण्यात गुन्हा दाखल केला आहे. रिक्षाचालक शफिक अहमद मोमीन आणि तीन अनोळखी रिक्षाचालक अशी गुन्हा दाखल झालेल्यांची नावे आहेत. पोलिसांनी दिलेल्या माहितीनुसार सोमवारी (ता. १४) सायंकाळी सहाच्या सुमारास तीनबत्ती परिसरातील आरपीआय एकतावादी पक्षाच्या कार्यालयाजवळ काही रिक्षाचालकांनी त्यांच्या रिक्षा पार्क करून ठेवल्या होत्या. त्याला पीडित महिलेने विरोध केला असता शफिकने गैरवर्तन करीत महिलेला अश्लील शब्दांत शिवीगाळ केली. तसेच, तिच्या मनास लज्जा होईल, असे कृत्य केले. त्या वेळी रिक्षाचालकासोबत आणखी तीन अनोळखी चालकही उपस्थित होते. त्यामुळे या सर्वांविरोधात पीडितेच्या तक्रारीवरून शहर पोलिस ठाण्यात गुन्हा दाखल केला आहे.