वाहनाचा धक्का लागल्याने मारहाण

वाहनाचा धक्का लागल्याने मारहाण
भिवंडी, ता. १७ (वार्ताहर) : एका वाहनाचा धक्का दुचाकीला लागल्याने दुचाकीची नंबर प्लेट तुटली. यामुळे दुचाकीचालकाने त्या वाहनचालकाशी वाद घालत त्याच्यासह गाडी मालकाला मारहाण केल्याची घटना घडली आहे. याप्रकरणी दुचाकी चालकाच्या विरोधात शहर पोलिस ठाण्यात गुन्हा दाखल केला आहे. अशोक दासरी असे गुन्हा दाखल झालेल्या दुचाकीचालकाचे नाव आहे, तर बाळकृष्ण गौरीशंकर केसरवाणी आणि त्याचा चालक, अशी जखमींची नावे आहेत. पोलिसांनी दिलेल्या माहितीनुसार, रविवारी (ता. १३) रात्री साडेनऊच्या सुमारास बाळकृष्ण हे त्यांच्या चालकासह गाडीने कामतघर येथील भाग्यनगरमधून जात होते. या वेळी त्यांच्या कारचा अशोकच्या दुचाकीला धक्का लागला. यात त्याच्या गाडीची नंबर प्लेट तुटली. त्यामुळे अशोकने बाळकृष्णच्या चालकाला मारहाण करण्यास सुरुवात केली, तर हे भांडण सोडवण्यासाठी बाळकृष्ण गेले असता अशोकने त्यांनाही बेदम मारहाण केली आहे. त्यामुळे याप्रकरणी मंगळवारी (ता. १५) बाळकृष्णच्या फिर्यादीवरून अशोकच्या विरोधात शहर पोलिस ठाण्यात गुन्हा दाखल केला आहे.