फेरीवालामुक्तीसाठी दिव्यात रास्ता रोको

फेरीवालामुक्तीसाठी दिव्यात रास्ता रोको
सकाळ वृत्तसेवा
डोंबिवली, ता. १७ : दिवा स्थानक परिसरात फेरीवाल्यांनी गर्दी केल्याने वाहतूक कोंडी होत असते. या वाहतूक कोंडीत रुग्णवाहिका अडकून पडतात; मात्र याकडे ठाणे पालिका प्रशासन कानाडोळा करत असल्याचा आरोप भाजपने करत गुरुवारी (ता. १७) दिवा चौक येथे पाऊण तास रास्ता रोको आंदोलन केले.

दिव्यातील फेरीवाल्यांविरोधात भाजपने गुरुवारी जनआंदोलन करत तब्बल पाऊण तास रास्ता रोको केला. ठाणे महापालिका प्रशासनाकडे वारंवार फेरीवालामुक्त दिवा परिसर करण्यासाठी ठोस कारवाई करण्याची मागणी करण्यात आली होती; मात्र प्रशासनाने याकडे दुर्लक्ष केल्याने दिव्यातील भाजप पदाधिकाऱ्यांनी रास्ता रोको आंदोलन केले. या आंदोलनात भाजप नेते संजय वाघुले, शिवाजी आव्हाड, भाजप दिवा शहर मंडळाचे अध्यक्ष सचिन भोईर, विजय भोईर, सपना भगत, सीमा भगत यांसह अनेक पदाधिकारी, कार्यकर्ते सहभागी झाले होते. तब्बल पाऊण तास दिवा चौकात हा रास्ता रोको केल्याने परिसरात कोंडी झाली होती. दिवा-अगासन रोड आणि दिवा-खर्डी रोड या दोन्ही रस्त्यांवर कोंडी झाली होती. दरम्यान, या वेळी पोलिसांनी मात्र बघायची भूमिका घेतल्याचे दिसून आले.

भाजप दिवा शहर मंडळाचे अध्यक्ष सचिन भोईर यांनी म्हटले की, रेल्वेस्थानकाबाहेर मोठ्या प्रमाणात फेरीवाले बसतात. त्यामुळे रोज कोंडी होते. परिणामी याचा फटका दिवेकरांना बसत आहे. पालिका प्रशासनाकडे वारंवार तक्रार करूनही ते दुर्लक्ष करत आहेत. त्यामुळेच आज आम्हाला आंदोलन आणि रास्ता रोको करण्याची वेळ आली. तसेच या वेळी भोईर यांनी सत्ताधारी शिवसेनेवर टीका करताना म्हटले की, मित्रपक्ष असूनही तो आमच्यासोबत नाही ही खेदाची बाब आहे. आज आम्ही दिवावासीयांसाठी लढत आहोत, जोपर्यंत फेरीवालामुक्त शहर करणार नाही, तोपर्यंत हा लढा चालू राहील, असे भोईर यांनी सांगितले.

आंदोलनानंतर कारवाई
दरम्यान, या वेळी पोलिस प्रशासन सुरुवातीला केवळ बघ्याच्या भूमिकेत होते. भाजप पदाधिकाऱ्यांनी रस्ता बंद केल्यानंतरदेखील त्यांना पोलिसांनी हटकले नाही. आंदोलन झाल्यानंतर केवळ काही पदाधिकाऱ्यांना ताब्यात घेऊन नंतर सोडून देण्यात आले. भाजपच्या आंदोलनानंतर पालिका प्रशासनाच्या अतिक्रमण हटाव पथकाकडून स्थानक परिसरात कारवाई करण्यात येत होती. काही फेरीवाल्यांनी आपली दुकाने स्वतःहून बंद ठेवली होती, तर भाजीपाला विक्रेते आपला व्यवसाय करत असल्याचे दिसून आले.