खड्ड्यांमुळे राज्यमार्गावरील प्रवास खडतर

पेण, ता. १७ (वार्ताहर) : पेण-खोपोली राज्यमार्गावर गागोदे खिंड ते आरावपर्यंत ठिकठिकाणी पडलेल्‍या खड्ड्यांमुळे चालक त्रस्त झाले आहेत. वाहन नादुरुस्‍त होणे, अपघात होणे, दुचाकी घसरण्याचे प्रकार वाढल्‍याने रस्‍त्‍याची तत्‍काळ डागडुजी करण्यात यावी, अशी मागणी वाहनचालकांसह नागरिकांकडून करण्यात येत आहे.
पेण-खोपोली राज्यमार्गाचे रखडलेले काम वर्ष-दीड वर्षांपूर्वीच पूर्ण झाले आहे; मात्र सध्या पेण तालुक्यातील गागोदे खिंड, गागोदे बुद्रुक, वरसई फाटा, आरावपर्यंत रस्‍त्‍याची चाळण झाली आहे. मोठमोठे खड्डे पडल्‍याने चालकांना कसरत करावी लागते. पाणी साचल्‍याने खोलीचा अंदाज येत नसल्‍याने वाहने उसळतात. तर खड्डे चुकवण्याच्या नादात दुचाकी घसरण्याचे प्रकारही वाढले आहेत. त्यामुळे गोगोदे खिंड ते आरावदरम्यानचे खड्डे लवकरात लवकर बुजवून रस्‍ता सुरळीत करावा, अशी मागणी परिसरातील नागरिकांकडून होत आहे.

पेण-खोपोली राज्यमार्गाचे काम दोन वर्षांपासून सुरू आहे; परंतु हेटवणे वसाहत ते आरावपर्यंत रस्ता पूर्णतः नादुरुस्त झाला आहे. ठिकठिकाणी खड्डे पडल्‍याने अपघातांचे प्रकार वाढले आहे. याबाबत राष्ट्रीय महामार्ग अधिकाऱ्यांशी संपर्क साधला असता दुर्लक्ष केले जात आहे. दोन दिवसांत रस्त्याची दुरुस्ती झाली नाही तर राष्ट्रीय महामार्गाच्या कार्यालयासमोर जनआंदोलन छेडण्यात येईल.
- संदीप रेणुका पाटील, सामाजिक कार्यकर्ते, गागोदे

वनविभागाच्या परवानगीची प्रतीक्षा
गागोदे खिंड ते आराव रस्त्यावर पडलेले खड्डे तत्काळ बुजवण्याचे काम सुरू आहे. दोन-तीन दिवसांपासून पावसाचा जोर वाढल्‍याने सध्या काम थांबवले होते. गागोदे खिंड येथील रस्ता वनविभागाच्या अखत्यारीत येत असल्याने येथील रुंदीकरण रखडले आहे. परवानगी मिळताच ते पूर्ण केले जाईल, अशी माहिती राष्‍ट्रीय महामार्ग प्राधिकरणाचे अभियंता रवींद्र कदम यांनी दिली.

पेण ः गागोंदे खिंड-आरावदरम्‍यान रस्‍ता खड्डेमय झाला आहे.