असल्फा परिसरात पाणीटंचाई

घाटकोपर, ता. १७ (बातमीदार)ः असल्फा परिसर डोंगराळ असल्याने येथील नागरिकांना पाण्यासाठी विविध अडचणींना सामोरे जावे लागत आहे. पावसाळ्यातही येथे पाणी समस्या उद्भवत असल्याने स्थानिक लोकप्रतिनिधींनी प्रशासनाला निवेदन दिले.
असल्फा परिसरातील साने गुरुजीनगर, लालबत्ती, हनुमान टेकडी, नारायण नगर, मराठवाडा चाळ, दत्त मंदिर परिसर, ओम साई धाम सोसायटी, वीर बजरंग क्रीडा मंडळ, भीम नगर, छत्रपती शिवाजी नगर, नवलादेवी मित्र मंडळ भागातील पाणीप्रश्नाबाबत माजी नगरसेवक किरण लांडगे, विजयेन्द्र शिंदे व ईश्वर तायडे यांनी मुंबई उपनगर जल अभियंता पुरुषोत्तम माळवदेंसोबत बैठक घेतली. या वेळी नागरिकांना उद्भवणाऱ्या विविध अडचणींबाबत निवेदन देण्यात आले. त्यात प्रामुख्याने अधिक क्षमतेचे पंप बसविणे, पाण्याची टाकी स्वच्छ करणे, टाकीची संरक्षण भिंत बांधणे, तसेच नवीन जलवाहिनीच्या कामांचा समावेश आहे.
----------------------------------
डोंगराळ भाग असल्याने येथे पाण्याची समस्या मोठ्या प्रमाणात आहे. याकरिता मोर्चा, आंदोलनातून लढा सुरू आहे.
-किरण लांडगे, माजी नगरसेवक