बर्डेपाडा रस्त्याची थातूरमातूर मलमपट्टी

किन्हवली, ता. १७ (बातमीदार) : किन्हवली-सो-कोचरे या मुख्य वर्दळीच्या रस्त्यावर बर्डेपाडा येथे मोठ्या प्रमाणात खड्डे पडलेले होते. या खड्ड्यांत पावसाचे पाणी साचल्यास वाहनचालकांना अंदाज येत नसल्याने दररोज अनेक छोटे-मोठे अपघात होत आहेत. या संदर्भात गुरुवारी (ता. १७) सकाळमध्ये वृत्त प्रसिद्ध होताच ठेकेदाराने थातूरमातूर मलमपट्टी केली आहे.
किन्हवली-सो-कोचरे या रस्त्यावर बर्डेपाड्यानजीक एकाच ठिकाणी चार-पाच मोठे खड्डे पडल्याने दुचाकीस्वारांचे अनेकदा अपघात झाले आहेत. पावसाच्या पाण्यामुळे भरलेल्या खड्ड्यांच्या खोलीचा अंदाज येत नसल्याने वाहने आदळून नुकसान होत आहे. यासाठी पडलेले खड्डे भरून प्रवाशांना दिलासा द्यावा, अशी मागणी केली जात होती. दुरुस्ती करूनही विशेष म्हणजे दरवर्षी पावसाळ्यात याच ठिकाणी खड्डे पडत असतात. यासंदर्भात ‘बर्डेपाडा येथे खड्ड्यांचे दुखणे!’ असे वृत्त गुरुवारी (ता. १७) सकाळमध्ये प्रसिद्ध होताच ठेकेदाराने खड्ड्यांवर थातूरमातूर मलमपट्टी केली आहे. रस्त्याच्या कडेला असलेल्या शेतातील माती खड्ड्यांवर टाकून खड्डे बुजवण्याचा प्रयत्न केला आहे. मात्र, पावसाने ही माती वाहून जाईल आणि पुन्हा एकदा खड्डे डोके वर काढतील, याची दक्षता घेतली नाही. टाकलेल्या या मातीमुळे चिखल होऊन वाहने घसरण्याची शक्यताच तर अधिक आहे.