अनधिकृत बांधकामांवरील कारवाई तत्काळ थांबवावी

भिवंडी, ता. १७ (वार्ताहर) : तालुक्यातील अनधिकृत बांधकामांवर सर्वोच्च न्यायालयाच्या निर्देशानंतर सुरू होणाऱ्या तोडक कारवाईच्या पार्श्वभूमीवर भिवंडी पश्चिमचे भाजप आमदार महेश चौघुले यांनी मुख्यमंत्री देवेंद्र फडणवीस यांची भेट घेतली. या भेटीत भिवंडीतील अनधिकृत बांधकामांवरील कारवाई तत्काळ थांबवावी आणि या बांधकामांसाठी उपाययोजना करावी, अशी मागणी केली आहे.
भिवंडीत गोदामे व लॉजिस्टिक पार्क मोठ्या प्रमाणात उभारण्यात आले आहेत. ज्यामुळे लाखो कुटुंबांचा रोजगार आणि उद्योगधंदा सुरू आहे. मात्र, सर्वोच्च न्यायालयाच्या निर्देशांनुसार एमएमआरडीए प्रशासनाकडून या इमारतींवर कारवाई, वीज व पाणीपुरवठा बंद करण्याच्या सूचना देण्यात आल्या आहेत. त्यामुळे येथील बांधकाम व्यावसायिक व जमीन मालकांमध्ये अस्वस्थता पसरल्याची बाब आमदार चौघुले यांनी मुख्यमंत्र्यांच्या निदर्शनास निवेदनाच्या माध्यमातून आणून दिली आहे. या निवेदनात सरकारने सर्वोच्च न्यायालयात पुनर्विचार याचिका दाखल करावी. २००७ पूर्वी आणि नंतरच्या बांधकामांचे वर्गीकरण करून स्वतंत्र धोरण जाहीर करावे, भिवंडीसाठी स्वतंत्र नियोजन व सवलतीसह विशेष समिती नेमावी, तोडक कारवाई आणि वीज-पाणी बंद करण्यास तत्काळ स्थगिती द्यावी, अशी मागणी निवेदनाद्वारे केली आहे.
भिवंडीतील अनधिकृत बांधकामांची समस्या केवळ बांधकामापुरती मर्यादित नसून, लाखो कुटुंबांच्या उपजीविकेचा व औद्योगिक विकासाचा प्रश्न आहे. म्हणून सरकारने यात तातडीने हस्तक्षेप करणे गरजेचे असल्याचे मुख्यमंत्र्यांच्या भेटीत निदर्शनास आणून दिले आहे. मुख्यमंत्री लवकरच यातून निश्चितच मार्ग काढतील, असा विश्वास आमदार चौघुले यांनी व्यक्त केला आहे.