हरवलेल्या नाल्यांचा शोध घेणार

विरार, ता. १७ (बातमीदार) : कामण परिसरातील पावसाळ्यात पाण्याचा निचरा करणारे बरेचसे छोटे-मोठे नाले गायब झाले आहेत. नाल्यात मातीचा अनधिकृत भराव करून त्यावर अनधिकृत बांधकामे करणाऱ्यांनी ही किमया केली आहे. गायब झालेल्या नाल्याबाबत भाजपचे केदारनाथ म्हात्रे यांनी पालिका अधिकाऱ्यांना जाब विचारला असताना पालिकेच्या अधिकाऱ्यांनी हे नाले शोधण्याचे आश्वासन त्यांना दिले आहे.

नाले बंद झाल्याने पावसाळ्यात पाणी रस्त्यावर साचते, मुरते व परिणामी रस्त्यांत भयानक खड्डे पडतात. आता कासवगतीने रस्त्याच्या काँक्रीटीकरणाचे काम सुरू आहे व जेथे काम झाले नाही, त्या ठिकाणी अगोदरच असलेल्या खड्ड्यांनी भयानक स्वरूप धारण केले असून, वाहनचालकांना जीव मुठीत घेऊन प्रवास करावा लागतो. कामण-भिवंडी रस्त्याच्या दुतर्फा बंद झालेले नाले खुले करावेत, अशी मागणी म्हात्रे यांनी आमदार स्नेहा दुबे यांनी भरविलेल्या महापालिका प्रभाग जीच्या जनसंवाद कार्यक्रमात लेखी स्वरूपात केल्यानंतर आज (ता. १७) महापालिकेला याप्रकरणी पाहणीचा मुहूर्त सापडला.

जी प्रभाग वालीवचे अभियंता समीर पाटील हे रस्त्यावर पहाण्यासाठी आले. हे पूर्वी असलेले नालेच गायब झाल्याचे म्हात्रे यांनी त्यांच्या निदर्शनास आणून दिले. पाहणी करताना कामण-भिवंडी रस्त्यावर साचलेल्या पाण्यातून चालण्याची कसरत पालिका अधिकाऱ्यांना करावी लागली. या भयानक स्थितीचा वस्तूनिष्ठ अहवाल वरिष्ठांना सादर करून बुजविण्यात आलेल्या नाले पूर्ववत करण्याची कारवाई करू, असे आश्वासन म्हात्रे यांना महापालिका अधिकाऱ्यांनी दिले आहे.