नवी मुंबई शहरातील तलाव चकाचक

नवी मुंबई शहरातील तलाव चकाचक
वाशी, ता. १६ (बातमीदार) ः उद्यानांचे शहर याप्रमाणेच तलावांचे शहर अशीही नवी मुंबईची वेगळी ओळख आहे. त्या अनुषंगाने ‘सफाई अपनाओ बिमारी भगाओ’ अभियानांतर्गत नमुंमपा आयुक्त डॉ. कैलास शिंदे यांच्या मार्गदर्शनाखाली आठही विभाग कार्यालय क्षेत्रातील जलाशय आणि परिसर स्वच्छतेची मोहीम राबवण्यात आली.
अतिरिक्त आयुक्त सुनील पवार यांच्या नियंत्रणाखाली राबविलेल्या या जलाशय स्वच्छता विशेष मोहिमेमध्ये घनकचरा व्यवस्थापन विभागाचे उपआयुक्त डॉ. अजय गडदे व स्मिता काळे आणि परिमंडळ एक उपआयुक्त सोमनाथ पोटरे व परिमंडळ दोन उपआयुक्त संजय शिंदे यांच्या माध्यमातून सर्वच विभागांमध्ये कार्यवाही करण्यात आली. याअतंर्गत जलाशयांमध्ये तराफ्यांव्दारे जलाशयावर तरंगणारा कचरा जाळीच्या सहाय्याने संकलित करण्यात आला. तसेच जलाशयांच्या किनाऱ्यावरील शेवाळयुक्त परिसर पावडर टाकून स्वच्छ करण्यात आला. तसेच परिसरातील नागरिकांना जलाशयात निर्माल्य न टाकण्याचे आवाहन करण्यात आले.
बेलापुर सेक्टर-२० येथील अमृतेश्वर तलाव, आग्रोळी तलाव, करावे तलाव, दारावे तलाव या जलाशयांची सखोल स्वच्छता करण्यात आली. नेरुळ विभागातही चिंचोली तलावाचा जलाशय आणि परिसर स्वच्छ करण्यात आला. वाशी सेक्टर-७ येथे जागृतेश्वर मंदिर तलाव आणि परिसराची सखोल स्वच्छता करण्यात आली. तुर्भे विभागात सेक्टर-२६ येथील कोपरी तलाव, तुर्भे गाव तलाव, खोकड तलाव सानपाडा या ठिकाणी जलाशयांची सखोल स्वच्छता करण्यात आली. कोपरखैरणे विभागात सेक्टर-१९ येथील धारण तलाव, खैरणे तलाव व महापे तलाव या ठिकाणी स्वच्छता करण्यात आली. घणसोली विभागातही रबाळे तलाव, स्व. राजीव गांधी खदाण तलाव गोठिवली, छत्रपती शिवाजी महाराज तलाव, गुणाली तलाव या ठिकाणी स्वच्छता करण्यात आली. ऐरोली सेक्टर-२० खाडी तलाव परिसर, ऐरोली तलाव या ठिकाणी जलाशयाची व परिसराची नागरिकांच्या सहयोगाने सखोल स्वच्छता करण्यात आली. दिघा विभागातही श्रीगणपती तलाव येथे स्वच्छता करण्यात आली.