कोरोना केंद्राच्या जागेवरच क्रिकेटचा सराव

कोरोना केंद्राच्या जागेवरच क्रिकेटचा सराव
ठाणे पालिका देणार मुंबई क्रिकेट असोसिएशनला जागा भाड्याने
सकाळ वृत्तसेवा
ठाणे, ता. १७ : कळवा, मुंब्रा, शिळ यासह आजूबाजूच्या परिसरातील क्रिकेट खेळात आवड व आपले करिअर करायचे आहे. आशा खेळाडूंना प्रशिक्षणासाठी मुंबई गाठवी लागत होती. आता मुंब्रा येथील भारतरत्न मौलाना अबुल कलाम आझाद क्रीडा संकुलातील कोरोना केंद्राची जागा क्रिकेट सरावासाठी तात्पुरत्या स्वरूपात मुंबई क्रिकेट असोसिएशनला भाडेतत्त्वावर देण्याचा निर्णय ठाणे महापालिका प्रशासनाने घेतला आहे. यासाठी प्रति खेळपट्टी, प्रति महिना आणि प्रति सत्राकरिता १० हजार रुपये इतके भाडे आकारण्यात येणार आहे.
ठाणे महापालिकेमार्फत मुंब्रा क्षेत्रात भारतरत्न मौलाना अबुल कलाम आझाद क्रीडा संकुल उभारण्यात आलेले आहे. यामध्ये ॲथलेटिक्स, फुटबॉल, लॉन टेनिस, बास्केटबॉल, स्वीमिंग बॅटमिंटन खेळांची सुविधा निर्माण करण्यात आल्या आहेत, परंतु या संकुलात क्रिकेट खेळासाठी कोणत्याही सुविधांचा समावेश करण्यात आला नव्हता.
दरम्यान, या संकुलात क्रिकेट खेळासाठी कोणत्याही सुविधेचा समावेश नसल्यामुळे क्रिकेट खेळपट्टी वापरासाठीच्या सुविधेकरिता दर निश्चित करण्यात आले नव्हते. त्यामुळे दादोजी कोंडदेव स्टेडियममध्ये खेळपट्टी सुविधेसाठी ठाणे पालिकेने केलेल्या ठरावानुसार दर आकारण्याचा निर्णय घेतला आहे. यानुसार प्रति खेळपट्टी, प्रति महिना आणि प्रति सत्राकरिता १० हजार रुपये याप्रमाणे भाडे आकारण्यात येणार असल्याची माहिती सूत्रांनी दिली.
--------------------------------------
सामुदायिक सहभागांनाही प्रोत्साहन
मुंब्रा परिसरातील अनेक तरुणांना क्रिकेटची आवड असलेल्या तरुणांचा हिरमोड होत होता. अशातच इच्छुक क्रिकेटपटूंना प्रशिक्षण, स्पर्धा करण्यासाठी मुंबई क्रिकेट असोसिएशन यांनी भारतरत्न मौलाना अबुल कलाम आझाद क्रीडा संकुलातील कोरोना केंद्र येथील जागा क्रिकेट सरावासाठी खेळपट्टी तयार करून प्रशिक्षण देण्यासाठी कायमस्वरूपी उपलब्ध देण्याची विनंती केली होती. या प्रस्तावास ठाणे महापालिकेच्या प्रशासकीय सभेने मान्यता दिली. याचा फायदा केवळ स्थानिक खेळाडूंनाच होणार नाही, तर निरोगी खेळ आणि सामुदायिक सहभागालाही प्रोत्साहन मिळणार आहे.
---------------------------------------