परळला जलद गाडीच्या थांब्यासाठी प्रयत्न करू

‘परळला जलद गाडीच्या थांब्यासाठी प्रयत्न करू’
मंगलप्रभात लोढा यांचे आश्वासन
मुंबई, ता. १७ : बहुराष्ट्रीय कंपन्यांची कार्यालये तसेच मोठ्या रुग्णालयांमुळे परळ स्थानकात गर्दी वाढली असून तेथे जलद गाडीला थांबा मिळावा, या मागणीबाबत रेल्वे प्रशासनाकडे पाठपुरावा करू, अशी हमी कौशल्य विकासमंत्री मंगलप्रभात लोढा यांनी दिली. महापालिकेच्या एफ दक्षिण विभाग कार्यालयातील जनता दरबारात बुधवारी (ता. १६) ते बोलत होते. या वेळी बारा विभागांसह रेल्वे प्रशासनाचे अधिकारीही उपस्थित होते.
अनधिकृत पार्किंग केलेली बेवारस वाहने, वाहतूक नियंत्रण प्रश्न, पाण्याचा कमी दाब, शिधावाटपाच्या समस्या, गृहनिर्माण सोसायट्यांचा पुनर्विकास आदी प्रश्न नागरिकांनी मांडले. या वेळी तीनशे समस्यांपैकी दोनशेहून अधिक समस्या तिथल्या तिथे सोडवण्यात आल्या. उरलेल्या समस्यांच्याही पाठपुरावा करण्यास लोढा यांनी अधिकाऱ्यांना सांगितले.