वसईत पोलिसांना मारहाणीची दुसरी घटना

बोळिंज, ता. १७ (बातमीदार) नालासोपाऱ्यातील वाहतूक पोलिसांना मारहाण केल्याचे प्रकरण ताजे असताना वसईतही दोन वाहतूक पोलिसांना एका रिक्षाचालकाने मारहाण केली आहे. भररस्त्यात जळती सिगारेट अंगावर फेकून कानशिलात लगावण्यात आली. याप्रकरणी रिक्षाचालकाविरोधात गुन्हा दाखल करण्यात आला आहे.

नालासोपारा पूर्व परिसरात मंगळवारी (ता. १५) दोन वाहतूक पोलिसांना बाप-लेकाकडून मारहाण करण्यात आली. यानंतर पुन्हा दोन दिवसांतच वसईत वाहतूक पोलिसांना रिक्षाचालकाकडून मारहाण करण्यात आली. वसई रेंज नाका येथे कर्तव्यावर असताना रिक्षाचालकाला पोलिसांनी अडवले, तसेच त्याच्याकडून वाहनाची कागदपत्रे मागत त्याला कुठून आला, कुठे चालला, याबाबत विचारणा करण्यात आली, तेव्हा रिक्षाचालकाने पोलिसाच्या अंगावर जळती सिगारेट फेकली व त्याला मारहाण करण्यास सुरुवात केली. हितेश नरेश लोहार (वय २९) असे या संशयित आरोपीने विठ्ठल नांगरे यांना मारहाण केल्याप्रकरणी वालीव पोलिस ठाण्यात गुन्हा दाखल करण्यात आला आहे.