भिवंडीतून दोन अल्पवयीन मुलींचे अपहरण

भिवंडीतून दोन अल्पवयीन मुलींचे अपहरण
भिवंडी, ता. १७ (वार्ताहर) : शहरात अल्पवयीन मुलींच्या अपहरणाच्या घटनांमध्ये वाढ झाली आहे. आता एकाच दिवशी शहरातील दोन भागांतून अल्पवयीन मुलींच्या अपहरणाच्या घटना समोर आल्या आहेत. पहिल्या घटनेत भिवंडी तालुक्यातील भाटला या गावातील सीमा जाधव यांची १७ वर्षीय मुलगी मोहिनी मंगळवारी (ता. १५) सकाळी साडेअकराच्या सुमारास अप्पर लोढा मानकोली या ठिकाणाहून बेपत्ता झाली. कुटुंबीयांनी शोध घेऊनही ती सापडली नाही. त्यामुळे तिच्या आईने दिलेल्या तक्रारीवरून बुधवारी (ता. १६) मोहिनीला फूस लावून पळवून नेल्याबद्दल अज्ञात व्यक्तीविरोधात अपहरणाचा गुन्हा दाखल करण्यात आला आहे. दुसऱ्या घटनेत नवीबस्ती ग्लोरी स्कूल परिसरातील रुक्सार यासीन खान यांची खुशनुमा ही १६ वर्षीय मुलगी बुधवारी दुपारी तीन वाजता घरात कोणाला काहीएक न सांगता निघून गेली. कुटुंबीयांनी परिसरात शोध घेतला; मात्र ती सापडली नाही. त्यामुळे तिचे अपहरण केल्याच्या तक्रारीवरून शहर पोलिस ठाण्यात अपहरणाचा गुन्हा दाखल केला आहे.