नेरळ ग्रामपंचायतीच्या जागेवर अतिक्रमण

नेरळ ग्रामपंचायतीच्या जागेवर अतिक्रमण
प्रशासनाकडून कानाडोळा; नागरिकांमध्ये नाराजी
कर्जत, ता. १७ (बातमीदार) ः तालुक्यातील नेरळ ग्रामपंचायतीच्या हद्दीत असलेल्या शहरातील ग्रामपंचायत कार्यालयाशेजारील १०१ चौरस मीटर इतक्‍या मालकीच्या जागेवर अतिक्रमण झाल्याचा गंभीर प्रकार उघडकीस आला आहे. संबंधित जागेवर एका खासगी बांधकाम व्यावसायिकाने पत्र्याचे शेड उभे केले असून, या जागेचा वापर बांधकाम साहित्य ठेवण्यासाठी केला जात आहे. दरम्यान, याप्रकरणी प्रशासनाकडून कानाडोळा करण्यात येत असल्याचे दिसून येत आहे.
ग्रामपंचायतीच्या मालकीची ही जागा असतानाही संबंधित व्यावसायिकाने आपल्या शेजारील भूखंडावर बांधकाम सुरू करताना कोणतीही मोजणी किंवा प्रशासनाची परवानगी घेतली नसल्याचे निदर्शनास येत आहे. सीमा निश्चित झाल्या नसल्याने अतिक्रमणासह ग्रामपंचायतीची जागासुद्धा हडप केल्याचा संशय नागरिकांनी व्यक्त केला आहे. गेल्या वर्षभरापूर्वी मोजणीसाठी ग्रामपंचायतीने लेखी निवेदन दिले होते, मात्र अद्याप कोणतीही मोजणी झालेली नाही. प्रशासनाकडून जाणूनबुजून दुर्लक्ष होत असल्याची चर्चा नागरिकांमध्ये आहे. स्थानिक ग्रामसेवक आणि प्रशासक हे बेकायदा काम डोळ्यांसमोर घडत असतानाही याकडे दुर्लक्ष करीत असल्याचे चित्र आहे. त्यामुळे ग्रामपंचायत प्रशासन आणि बांधकाम व्यावसायिक यांच्यात काही गौडबंगाल असल्याची चर्चा सुरू आहे. हीच जागा सुशोभीकरणासाठी आणि महापुरुषांचे स्मारक उभारण्यासाठी राखीव ठेवण्यात यावी, अशी मागणी आधीपासून होती. छत्रपती संभाजीराजे, अहिल्यादेवी होळकर यांच्या स्मारकांच्या चर्चाही या परिसरात सुरू होत्या. मात्र त्याऐवजी खासगी व्यक्तींकडून जागेचा गैरवापर सुरू असल्याने नागरिकांमध्ये तीव्र नाराजी आहे.

####################

चार्ज घेण्यापूर्वी हे काम सुरू झाले होते. याबाबत संबंधितांना नोटीस काढण्यात आलेल्या आहेत. याबद्दल अधिक माहिती घेत आहोत.
- सुजित धनगर, प्रशासक, ग्रामपंचायत नेरळ