कल्याणमध्ये घरखर्चासाठी चोऱ्या

कल्याणमध्ये घरखर्चासाठी चोऱ्या

कल्याण, ता. १७ (बातमीदार) : घरखर्च भागत नसल्याने घरातील कर्त्या पुरुषाने चोरीच्या मार्गाचा अवलंब केल्याची बाब कल्याण पोलिसांच्या निदर्शनास आली आहे. कल्याणच्या कोळसेवाडी व महात्मा फुले पोलिस ठाण्यात नुकतेच दोन गुन्हे उघडकीस आले होते. यात आरोपींना ताब्यात घेतले असता घरखर्चासाठी गुन्हा केल्याची कबुली आरोपींनी दिल्याची माहिती सहाय्यक पोलिस आयुक्त कल्याणजी घेटे यांनी पत्रकार परिषदेत दिली.

कल्याण पूर्वेतील गणेशवाडी परिसरात मंगळवारी (ता. १५) सकाळी महिलेच्या गळ्यातील आठ ग्रॅम वजनी सोनसाखळी खेचून चोरट्याने पोबारा केला होता. कोळसेवाडी पोलिसांनी सीसीटीव्हीच्या आधारे शोध घेत प्रीतम जाधवला ताब्यात घेतले; मात्र चौकशीदरम्यान त्याने घराचे थकलेले भाडे भरण्यासाठी ही चोरी केल्याची कबुली पोलिसांना दिली. या आरोपीची कोणतीही गुन्हेगारी पार्श्वभूमी नसल्याचे पोलिसांच्या तपासात आढळून आले आहे. तसेच बेरोजगारीमुळे हे कृत्य केल्याचे निष्पन्न झाले आहे.

कल्याण पश्चिमेतील महात्मा फुले पोलिस ठाण्यात २३ जून रोजी रिक्षा चोरीचा गुन्हा दाखल झाला होता. त्या अनुषंगाने गुन्हे प्रकटीकरण कक्षाला मिळालेल्या गोपनीय माहितीच्या आधारे संशयास्पद रिक्षाचा शोध लागला. या आरोपीला हटकले असता पोलिसांचा संशय बळावला. यानंतर त्याला ताब्यात घेऊन चौकशी केली असता त्याने रिक्षा चोरीची कबुली दिली. हा आरोपी सराईत गुन्हेगार असून त्याच्या नावावर आधीही गुन्हे दाखल आहेत. त्याने ही रिक्षा उदरनिर्वाहासाठी चोरी केल्याचे समोर येत असून, पोलिस पुढील तपास करीत आहेत.