सिडकोवर हंडा-कळशी मोर्चा

सिडकोवर हंडा-कळशी मोर्चा
पाणीप्रश्नावर स्वप्नपूर्ती रहिवाशांचे आंदोलन

खारघर, ता. १७ (बातमीदार) : स्वप्नपूर्ती सोसायटीतील जवळपास ३५०० कुटुंबीयांना अनेक महिन्यांपासून पाण्याचा प्रश्न भेडसावत आहे. याप्रकरणी अधिकाऱ्यांकडून केवळ आश्वासनांचा लेप लावला जात असल्यामुळे गुरुवारी रहिवाशांनी सिडकोच्या बेलापूर येथील रायगड भवन कार्यालयावर हंडा-कळशी मोर्चा काढला होता. यात मोठ्या संख्येने महिलाही उपस्थित होत्या, मात्र या वेळीही पोकळ आश्वासन देण्यात आल्‍याने रहिवाशांनी नाराजी व्यक्त केली.
खारघर सेक्टर-३६ मधील सिडकोच्या स्वप्नपूर्ती गृहसंकुलातील ८, ४ आणि ५ सोसायटीतील रहिवाशांनी हंडा, कळशी घेऊन, जोरदार घोषणाबाजी करीत रायगड भवन गाठले. या ठिकाणी पोलिसांची कुमक वाढवण्यात आली होती. पावसाळ्यातही घरात पाणी येत नाही. बाहेर पाऊस अन् घशाला कोरड, अशी अवस्था झाल्‍याचे संतप्त महिलांनी सांगितले. स्वप्नपूर्तीच्या घरातील नळात पाणी नाही, परंतु त्यांच्या भिंतींतून गळती सुरू आहे. सिडकोने आम्हाला समस्यांचे घर दिल्‍याचा आरोप रहिवाशांकडून करण्यात आला.
जवळपास दोन तासांच्या घोषणाबाजीनंतर प्रशासनाला जाग आली आणि त्यांनी लेखी आश्वासन देऊन मोर्चा स्थगित करण्याची विनंती केली. यापुढे पाण्याची समस्या उद्भवल्यास पुढील आंदोलन अधिक तीव्र करण्यात येईल आणि त्याला सिडको प्रशासन जबाबदार असेल, असा इशाराही स्वप्नपूर्तीमधील रहिवाशांनी दिला. आंदोलनाचे नेतृत्व शरद बिबवे, बाळकृष्ण खोपडे आणि दिलीप पाटील यांनी केले.

दुरुस्‍तीमुळे टंचाई
हेटवणे धरणाची पाइपलाइन, खारपाडा पूल परिसरातील आपत्कालीन दुरुस्तीच्या कामामुळे ९ ते १० जुलै कालावधीत द्रोणागिरी, उलवे, खारघर व तळोजा नोडमध्ये पाणीपुरवठा बंद ठेवण्यात आला होता. दुरुस्तीचे काम पूर्ण झाले असून, लवकरच पाणीपुरवठा सुरळीत होईल. यापुढे नियमित व पुरेसा पाणीपुरवठा होईल, याची काळजी घेण्यात येईल, असे आश्‍वासन पाणीपुरवठा विभागाच्या कार्यकारी अभियंता व्ही. बी. गायकवाड यांनी पत्राद्वारे दिले आहे.