उरणचे पदपथ व्यापाऱ्यांकडून गिळंकृत

उरणचे पदपथ व्यापाऱ्यांकडून गिळंकृत
उरण, ता. १७ (वार्ताहर) ः मागील काही वर्षांपासून उरण शहराच्या विकासात भर पडली आहे. त्‍यामुळे मोठ्या प्रमाणावर बाजारपेठ निर्माण झाली आहे; मात्र प्रशासनाच्या दुर्लक्षेमुळे शहरात विक्रेत्यांचे पदपथावरील अतिक्रमण वाढले आहे. त्यामुळे नागरिकांना चालताना अडचण निर्माण होत आहे. अशा विक्रेत्यांवर कारवाई करण्यात यावी, अशी मागणी नागरिकांकडून करण्यात येत आहे. यासंदर्भात उरण नगरपालिकेचे मुख्याधिकारी समीर जाधव यांच्याशी संपर्क केला असता प्रतिसाद देण्यात आला नाही.
अटल सेतू, उरण लोकल सेवा आदी मोठमोठे प्रकल्‍प शहरात आल्याने मोठ्या प्रमाणात शहरीकरण झाले आहे. त्‍यामुळे वाहतुकीची वर्दळ वाढली आहे. तसेच लोकसंख्येतदेखील झपाट्याने वाढ झाल्याने सकाळ-सायंकाळी रस्त्यावर नागरिकांची गर्दी असते. त्यामुळे शहरातील रस्तेही अपुरे पडू लागले आहेत. त्यातच रस्त्यावर नेहमीच वाहतूक कोंडी होत असते. नगरपालिकेने शहराची निर्मिती करताना वाहनांबरोबरच नागरिकांना चालण्यासाठी पदपथ निर्माण केले आहेत. रस्ते तयार करताना रस्त्याच्या दोन्ही बाजूने पाण्याचा निचरा होण्यासाठी गटारांची निर्मिती केली आहे; मात्र व्यापाऱ्यांच्या मनमानी कारभारामुळे पदपथावरील अतिक्रमण वाढले आहे. अनेक दुकानदारांनी शटर पुढे आणले आहेत. तसेच दुकानासमोरील जागेवर सामान ठेवून जागा गिळंकृत केली आहे. त्यामुळे नागरिकांना चालण्यासाठी अडथळा निर्माण होत आहे. व्यापाऱ्यांनी गिळंकृत केलेल्या पदपथावर नगरपालिकेने कारवाई करून ते खुले करावे, अशी मागणी नागरिकांकडून करण्यात येत आहे.
............
बेकायदा दुचाकी पार्किंग
शहरामध्ये मोठ्या प्रमाणात बेकायदा दुचाकी पार्किंग करण्यात येत आहे. रस्‍त्‍याच्या दोन्‍ही बाजूंना बेकायदा दुचाकी पार्क करण्यात येत असल्याने रस्‍ते अपुरे पडू लागले आहेत. त्‍यामुळे गर्दीच्या वेळी नागरिकांना चालताना अडचण निर्माण होत आहे. त्‍यातच विक्रेत्‍यांनी पदपथ गिळंकृत केल्याने सकाळ-संध्याकाळ शहरात वाहतूक कोंडी होत आहे. त्‍यामुळे शहरातील बेकायदा पार्किंगवर कारवाई करण्यात यावी, अशी मागणी उरणकरांकडून करण्यात येत आहे.