पनवेल रेल्वेस्थानकासमोरील रस्त्यांची चाळण

पनवेल रेल्वेस्थानकासमोरील रस्त्यांची चाळण
वारंवार डागडुजी होऊनही समस्या कायम
नवीन पनवेल, ता. १७ (बातमीदार) ः पनवेल रेल्वेस्थानकासमोरील रस्त्यांची सध्या चाळण झाल्याने वाहनचालकांना कसरत करावी लागत आहे. नवीन पनवेलकडे जाणाऱ्या मार्गावर मोठेमोठे खड्डे पडले आहेत. त्यात खडी टाकून डागडुजी केली जाते; परंतु निकृष्ट दर्जाचे काम करण्यात येत असल्याने पावसात पुन्हा स्थिती जैसे थे होते. वारंवार डागडुजी होऊनही खड्ड्यांची समस्या कायम असल्याने पनवेलकर त्रस्त आहेत.
मागील काही वर्षांत पनवेलचा मोठ्या प्रमाणात विकास झाला आहे. त्‍यामुळे लोकसंख्येत कमालीची वाढ झाली आहे. शिवाय मध्य रेल्‍वेच्या हार्बर मार्गावर पनवेल रेल्‍वे स्‍थानक महत्त्‍वाचे म्‍हणून पाहिले जाते. त्‍यामुळे सकाळ-सायंकाळ रेल्‍वेस्‍थानकातून मोठ्या प्रमाणात प्रवाशांची ये-जा सुरू असते. त्‍यातच नवीन पनवेलमधील प्रवासी मोठ्या प्रमाणात स्‍थानक गाठण्यासाठी दुचाकी तसेच चारचाकी वाहनांचा वापर करतात. मात्र यंदा पावसात नवीन पनवेलकडे जाणाऱ्या रस्‍त्‍यावर मोठ्या प्रमाणात खड्डे पडले आहेत. त्‍यामुळे वाहनचालकांना कसरत करून स्‍थानक गाठावे लागते. शिवाय खड्ड्यांमुळे वाहतूक मंदावत असल्याने मोठ्या प्रमाणात कोंडी या मार्गावरून दिसून येते. महापालिकेच्या माध्यमातून मागील काही दिवसांत तात्पुरती मलमपट्टी करण्यात आली होती. दरम्यान, जोरदार पावसामुळे टाकण्यात आलेली खडी उखडली आहे. त्‍यामुळे दुचाकी चालकांचे सर्वाधिक अपघात होत आहेत. त्‍यामुळे वाहनचालकांकडून पालिकेच्या कामावर रोष व्‍यक्‍त केला जात आहे. महापालिकेने या रस्‍त्‍याची डागडुजी करावी, अशी मागणी करण्यात येत आहे.
......................