खालापुरात कापूर उत्पादक कारखान्याला आग

कापूर उत्पादक कारखान्याला आग
खालापुरातील दुर्घटनेत मोठे नुकसान

खालापूर, ता. १७ (बातमीदार) ः तेलवाहक पाइपलाइनमधून गळती झालेल्या तेलाचा शॉर्टसर्किटमुळे उडालेल्या ठिणग्यांशी संपर्क होऊन आग लागल्याची घटना बुधवारी (ता. १६) रात्री साडेदहा वाजण्याच्या सुमारास मंगलम कापूर उत्पादक कारखान्यात घडली.
तालुक्यात सावरोली-खारपाडा मार्गावर कुंभिवली गावाच्या हद्दीत हा कारखाना आहे. छोट्या आगीचे रूपांतर क्षणार्धात मोठ्या आगीत झाले. कामगारांनी सतर्क होऊन तातडीने आगीची माहिती दिल्याने सर्व यंत्रणा सावध झाली. खालापूर पोलिस ठाण्याचे निरीक्षक सचिन पवार यांनी तातडीने परिसरातील अग्निशामक बंब बोलावले. अत्यंत ज्वालाग्राही उत्पादन असल्याने आगीचा भडका वाढतच होता. साधारण चार ते पाच किलोमीटर अंतरावरूनदेखील आगीचे लोळ दिसत होते. घटनेचे गांभीर्य पाहून नायब तहसीलदार सुधाकर राठोड, रसायनी पोलिस ठाण्याचे निरीक्षक संजय बांगर यांनीदेखील तातडीने परिसरातील अग्निशमन बंब घटनास्थळी पाठवले. १२ अग्निशमन बंबांनी साधारण चार तासांच्या अथक प्रयत्नांनंतर आगीवर पूर्णपणे नियंत्रण मिळवले. या दुर्घटनेत कोणताही कामगार जखमी झाला नसला तरी प्लांटचे प्रचंड नुकसान झाले आहे.
...
तेलगळती सुरू असल्याने आग आटोक्यात येण्यास वेळ लागला; परंतु मंगलम कारखान्याची अग्निशमन यंत्रणा अतिशय सुसज्ज असल्याने मोठी दुर्घटना टळली. कोणतीही जीवितहानी झालेली नाही.
- सचिन पवार, पोलिस निरीक्षक, खालापूर पोलिस ठाणे