मिरा भाईंदर सर्वोत्तम पंचतारांकित कचरामुक्त शहर

सर्वोत्तम पंचतारांकित कचरामुक्त शहर
मिरा-भाईंदर महानगरपालिकेचा सन्मान

भाईंदर, ता. १७ (बातमीदार) : केंद्र सरकारच्या स्वच्छ सर्वेक्षण स्पर्धेत भाईंदर महानगरपालिकेची सर्वोत्तम पंचतारांकित कचरामुक्त शहर म्हणून निवड झाली आहे. ही निवड तीन ते १० लाख लोकसंख्या श्रेणीतील महापालिकांमधून करण्यात आली आहे. नवी दिल्लीतल्या विज्ञान भवन येथे गुरुवारी (ता. १७) झालेल्या समारंभात राष्ट्रपती द्रौपदी मुर्मू यांच्या हस्ते महानगरपालिकेला हा राष्ट्रपती पुरस्कार प्रदान करण्यात आला.
२०२२ व २०२३च्या स्वच्छ सर्वेक्षण स्पर्धेत मिरा-भाईंदरचा समावेश तृतीय तारांकित कचरामुक्त शहर या श्रेणीत होता. २०२४ मध्ये झालेल्या स्पर्धेसाठी मिरा-भाईंदर महानगरपालिकेने शहर स्वच्छतेच्या बाबतीत सर्वोत्तम कार्य करीत सर्वोत्तम पंचतारांकित कचरामुक्त शहर हे मानांकन प्राप्त केले आहे. त्यासोबतच महापालिकेला ‘वॉटर प्लस सिटी’ म्हणूनही मानांकन मिळाले आहे. राष्ट्रपतींच्या हस्ते हा पुरस्कार राज्याच्या नगरविकास राज्यमंत्री माधुरी मिसाळ व महानगरपालिका आयुक्त राधाबिनोद शर्मा यांनी स्वीकारला. या वेळी उपायुक्त डॉ. सचिन बांगर, शहर अभियंता दीपक खांबित या अधिकाऱ्यांसोबतच महापालिकेचे सफाई कर्मचारी अशोक भोईर आणि विकास माची हे दोघे कर्मचाऱ्यांचे प्रतिनिधी म्हणून उपस्थित होते.
‘हा राष्ट्रीय पुरस्कार व मिळालेले मानांकन फक्त महानगरपालिकेचा नव्हे; तर संपूर्ण मिरा-भाईंदर शहराच्या नागरिकांचा केंद्र शासनाने केलेला विशेष सन्मान आहे. आपल्या शहराने दाखवलेली जागरूकता, नागरिकांचा स्वच्छतेसाठीचा सहभाग आणि कर्मचाऱ्यांनी केलेले प्रामाणिक श्रम यामुळे हे शक्य झाले आहे. आपण पुढेही स्वच्छता हीच सेवा मानून, शाश्वत शहराकडे वाटचाल करीत मिरा-भाईंदर शहराची प्रगती करू,’ अशी प्रतिक्रिया मिरा- भाईंदर महानगरपालिकेचे आयुक्त राधाबिनोद शर्मा यांनी व्यक्त केली आहे.