अंबरनाथ नगरपालिकेत दोन ठेकेदारांमध्ये हाणामारी

अंबरनाथ, ता. १७ (बातमीदार) : अंबरनाथ नगरपालिकेत पदपथ विक्रेता सदस्यांच्या निवडणुकीची प्रक्रिया पार पडल्यानंतर प्रशासकीय इमारतीमध्येच दोन ठेकेदारांमध्ये हाणामारी झाल्याने गोंधळाची परिस्थिती निर्माण झाली होती.
नगरपालिकेत लहान मोठी कामे करणारा ठेकेदार बॉस्को सुसाईनाथ आणि व्यंकटेश पिचिकरन या दोघांमध्ये काही दिवसांपासून वाद निर्माण झाले होते. याप्रकरणी पोलिस ठाण्यात तक्रारही दाखल करण्यात आली होती. मात्र, गुरुवारी नगरपालिका कार्यालयात फेरीवाल्यांची निवडणुकीची प्रक्रिया सुरू असतानाच आणि पालिकेत बंदोबस्तासाठी असलेल्या पोलिसांसमोरच दोन ठेकेदारांच्या गटांमध्ये हाणामारी सुरू झाली. या हाणामारीत व्यंकटेश या ठेकेदाराच्या समर्थकांनी बॉस्कोला मारहाण करून गंभीर जखमी केले. हाणामारी सुरू असताना पोलिसांनी आणि अंबरनाथ पालिकेच्या सुरक्षारक्षकांनी या सर्वांना रोखण्याचा प्रयत्न केला. पोलिस हस्तक्षेप करत असतानाही दोन्ही गट एकमेकांवर अंगावर धावून जात होते. या हाणामारीनंतर पोलिसांनी दोन्ही गटांतील युवकांना ताब्यात घेतले. रात्री उशिरापर्यंत गुन्हा दाखल करण्याची प्रक्रिया सुरू होती.