सोसायटीतील वृक्षछाटणीत २५ पक्ष्यांचा मृत्यू

सोसायटीतील वृक्षछाटणीत २५ पक्ष्यांचा मृत्यू
घोडबंदर येथील घटना

सकाळ वृत्तसेवा
ठाणे, ता. १७ : घोडबंदर रोडवरील ऋतू एन्क्लेव्ह सोसायटीच्या आवारात वृक्षछाटणी करीत असताना, त्यावर बसलेल्या २५ पक्ष्यांचा मृत्यू झाला, तर १५ पक्ष्यांना वाचविण्यात यश आल्याचा दावा करणारा व्हिडिओ समाजमाध्यमांवर प्रसारित झाला आहे. यानंतर पालिकेच्या उद्यान विभागाने घटनास्थळी धाव घेत पाहणी केली असता वृक्षछाटणी करीत असताना अटी-शर्तींचा भंग केल्याचे निदर्शनास आले असून, त्या अनुषंगाने सोसायटीविरोधात कायदेशीर कारवाई करण्यात येणार असल्याची माहिती पालिकेच्या वृक्ष प्राधिकरण विभागाने दिली.
ठाणे पालिका हद्दीत पावसाळ्यात झाडे पडून होणाऱ्या दुर्घटना टाळण्यासाठी पालिकेच्या वृक्ष प्राधिकरण विभागाकडून रस्त्याकडेला असलेल्या वृक्षांची छाटणी करण्यात येत असते. सोसायटी व गृहसंकुलांच्या आत असलेल्या धोकादायक वृक्षांची छाटणी करण्याची परवानगी वृक्ष प्राधिकरण विभागाने दिली. त्यानुसार अशातच घोडबंदर भागातील ऋतू एन्क्लेव्ह सोसायटीच्या वतीने ठाणे पालिकेच्या वृक्ष प्राधिकरण विभागाकडे धोकादायक वृक्षछाटणीची परवानगी मागितली. पालिकेने त्यांना परवानगी दिली होती, परंतु वृक्षावर पक्ष्यांचे घरटे अथवा अन्य वन्यजीवांचे वास्तव्य असणार नाही अशा अटी घातल्या होत्या. या अटींचे उल्लंघन केल्याचे उद्यान तपासणीस रोहित पवार यांनी प्रत्यक्ष केलेल्या स्थळ पाहणीत आढळून आले. यामुळे सोसायटीचे पदाधिकारी व कर्मचारी तसेच कंत्राटदार यांच्यावर गुन्हा दाखल करण्यात यावा, असे पत्र वृक्ष प्राधिकरण विभागाने कासारवडवली पोलिसांना दिले असल्याची माहिती उद्यान निरीक्षक केदार पाटील यांनी दिली. दरम्यान, १५ पक्ष्यांना वाचविण्यात यश आल्याचा दावा करणारा व्हिडिओ समाजमाध्यमांवर फिरतो आहे.