पनवेल पालिका देशात सहावी

पनवेल पालिका देशात सहावी

पनवेल, ता. १७ (बातमीदार) : पनवेल शहराने स्वच्छतेच्या दिशेने एक महत्त्वपूर्ण टप्पा गाठत स्वच्छ सर्वेक्षण २०२४-२५ मध्ये देशपातळीवर आणि राज्यपातळीवर भरीव कामगिरी बजावली आहे. केंद्रीय गृहनिर्माण व शहरी कार्य मंत्रालयाच्या वतीने दरवर्षी घेतल्या जाणाऱ्या स्वच्छतेच्या सर्वेक्षणामध्ये या वर्षी स्वच्छ सर्वेक्षण २०२४-२५मध्ये तीन लाख ते १० लाख लोकसंख्या गटात पनवेल महापालिकेला देशात सहावा क्रमांक प्राप्त झाला आहे.
हा सन्मान म्हणजे पनवेल शहराच्या स्वच्छतेसाठी करण्यात आलेल्या कार्याची पावती आहे. कचरामुक्त शहर मानांकनात थ्री स्टार आणि ओडीएफमध्ये सर्वोच्च वॉटर प्लस ही सर्वोच्च श्रेणीदेखील शहराने सलग राखली आहे. महापालिकेस मिळालेल्या या यशाबद्दल आज झालेल्या प्रशासकीय महासभेत आयुक्त चितळे यांनी घनकचरा व स्वच्छता विभागाचे उपायुक्त डॉ. वैभव विधाते आणि त्यांच्या टीमचे पुष्पगुच्छ देऊन अभिनंदन केले. ‘महानगरपालिका भविष्यातही स्वच्छ, हरित आणि पर्यावरणपूरक शहर उभारण्याच्या दिशेने कार्यरत राहणार आहे. पालिका यशाची शिडी चढत असताना ही फक्त सुरुवात असून स्वच्छ, सुंदर व आरोग्यदायी शहर निर्मितीसाठी प्रयत्न सुरूच राहणार आहेत. लोकप्रतिनिधी आणि नागरिकांच्या सहभागामुळे हे यश शक्य झाले असून, पुढील काळातही पनवेल महापालिका अशाच प्रकारे देशपातळीवर उत्कृष्टता सिद्ध करीत राहील,’ असे पनवेल पालिकेचे उपायुक्त वैभव विधाते यांनी सांगितले.