भर्ती प्रक्रीयेत उत्तर देणाऱ्या पर्यवेक्षकाविरोधात महापालिकेची तक्रार

भरती प्रक्रियेत उत्तर देणाऱ्या पर्यवेक्षकाविरोधात महापालिकेची तक्रार
सकाळ वृत्तसेवा
नवी मुंबई, ता. १७ ः नवी मुंबई महापालिका सरळ सेवा भरतीची प्रक्रिया सुरू आहे. याबाबत ऑनलाइन परीक्षेदरम्यान १६ जुलैला दुपारी १ ते ३ वाजताच्या परीक्षा सत्रात कोल्हापूर जिल्ह्यातील परीक्षा केंद्रावर उपस्थित पर्यवेक्षकामार्फत विद्यार्थ्यास परीक्षेच्या दरम्यान उत्तराचा पुरवठा केला गेल्याची तक्रार प्राप्त झाली होती. या तक्रारीची गंभीर दखल घेत तातडीने चौकशी करण्यात आली. पर्यवेक्षकामार्फत एका उमेदवारास २ ते ३ प्रश्नांची उत्तरे उमेदवाराने न विचारता पर्यवेक्षक सांगत असल्याचे सीसीटीव्ही चित्रीकरणात निदर्शनास आले. त्या अनुषंगाने या पर्यवेक्षकास त्वरित पर्यवेक्षक पदावरून हटविण्यात आले. कोल्हापूर जिल्ह्यात नियुक्त नवी मुंबई महापालिकेचे परीक्षा समन्वय अधिकाऱ्यांमार्फत परीक्षा घेणाऱ्या टीसीएस संस्थेस या पर्यवेक्षकावर कारवाई करण्याचे निर्देश देण्यात आले आहेत. त्यानुसार परीक्षा घेणाऱ्या संस्थेमार्फत संबंधित पर्यवेक्षकावर पोलिस ठाण्यात तक्रार दाखल करण्याची कारवाई करण्यात येत आहे. नवी मुंबई महापालिकेची परीक्षा प्रक्रिया अत्यंत पारदर्शक पद्धतीने होण्याकरिता अगदी सुरुवातीपासून संपूर्ण दक्षता घेण्यात आली आहे. परीक्षापूर्व व परीक्षा कालावधीतही सर्व बाबींवर काटेकोर लक्ष ठेवण्यात येत आहे. त्यामुळे परीक्षेस प्रविष्ट झालेल्या उमेदवारांनी परीक्षा प्रक्रियेबाबत कोणत्याही प्रकारची संदिग्धता बाळगू नये तसेच अफवांना बळी पडू नये, असे आवाहन नवी मुंबई महापालिकेतर्फे करण्यात येत आहे.