सफाई कर्मचा-यांच्या संपाचा निर्णय २३ जुलैपर्यंत स्थगीत

सफाई कर्मचाऱ्यांच्या संप २३ जुलैपर्यंत स्थगित
मुख्यमंत्र्यांच्या मध्यस्तीनंतर संघर्ष समितीचा निर्णय
सकाळ वृत्तसेवा
मुंबई, ता. १७ : पालिकेतील घनकचरा विभागातील खासगीकरणाविरोधात पालिका कर्मचाऱ्यांनी संपावर जाण्याचा घेतलेला निर्णय मुख्यमंत्री देवेंद्र फडणवीस यांच्या आश्वासनानंतर २३ जुलैपर्यंत स्थगित करण्यात आला आहे; मात्र पालिका प्रशासनाने तोपर्यंत निविदा रद्द न केल्यास संप अटळ असल्याचा इशारा कामगारांच्या संघर्ष समितीने दिला आहे.
पालिकेच्या सफाई व परिवहन विभागातील कायम व कंत्राटी कामगारांनी महापालिकेच्या खासगीकरणाच्या निर्णयाविरोधात बुधवारी (ता. १६) संपावर जाण्याची भूमिका घेतली होती. या पार्श्वभूमीवर गुरुवारी (ता. १७) आझाद मैदानात मोर्चा काढण्यात आला. यावेळी मंत्री गिरीश महाजन यांनी आझाद मैदानात मोर्च्याच्या ठिकाणी येऊन दुपारी भेट घेत चर्चा केली. त्यानंतर मुख्यमंत्री देवेंद्र फडणवीस यांच्यासोबत सायंकाळी कर्मचाऱ्यांच्या शिष्टमंडळाची मंत्रालयात बैठक पार पडली. त्यानंतर संप स्थगित करण्यात आला.
बैठकीत माजी आमदार कपिल पाटील, कामगार नेते सुरेश ठाकूर आणि कॉम्रेड विजय कुलकर्णी, रमाकांत बने, कामगार सेनेचे बाबा कदम, संजय बापेरकर उपस्थित होते.

समिती होणार नियुक्त
शिष्टमंडळासोबत झालेल्या बैठकीनंतर मुख्यमंत्री देवेंद्र फडणवीस यांनी संघर्ष समितीच्या मागण्या मान्य केल्या. सफाई कामगारांच्या आर्थिक सामाजिक राजकीय आणि आरोग्य स्थिती याचा अभ्यास करून निर्णय घेण्यासाठी निवृत्त न्यायाधीशांच्या अध्यक्षतेखाली एक समिती गठीत करण्यात येणार असल्याचेही आश्वासन यावेळी देण्यात आले. कोणतीही कर्मचारी पदे कमी होणार नाहीत, लाड-पागे समितीच्या शिफारशी लागू राहतील, मालकी हक्काची घरे दिली जातील असे आश्वासन मुख्यमंत्र्यांनी दिल्याची माहिती कामगार नेते रमाकांत बने यांनी दिली.

लेखी करार करण्याची मागणी
मुख्यमंत्र्यानी आश्वासन दिलेले असले तरी प्रत्यक्षात निविदा रद्द झाली नाही तर संप अटळ असेल अशी भूमिका संघटनेने घेतली आहे. मुख्यमंत्र्यांनी दिलेली आश्वासने तोंडी असून याबाबत येत्या दोन तीन दिवसात लेखी करार करण्याची कामगार संघटनांची मागणी आहे. प्रशासनाने कचऱ्याच्या गाड्या घ्याव्यात पण त्यावर मनुष्यबळ पालिकेच्या कामगारांचे असेल अशी भूमिका कामगार संघटनांची असल्याचे कामगार सेनेचे संजय बापेरकर यांनी सांगितले.
............

...........