अतिरिक्त शिक्षकांचे समायोजन मुंबईतच हाेणार

अतिरिक्त शिक्षकांचे समायोजन मुंबईतच हाेणार
मुंबई, ता. १७ ः मुंबई महानगरपालिकेच्या शाळांमध्ये सुमारे एक हजार १०० रिकाम्या असलेल्या जागांवर शिक्षकांचे समायोजन होणार आहे. शिक्षण उपसंचालक कार्यालयाने परिपत्रकाद्वारे मुंबईतील शिक्षकांचे समायोजन मुंबई महानगरपालिकेच्याच शाळांमध्ये करण्याचे आदेश देऊन त्यांच्या वेतनाची अदा मूळ शाळेमधून करण्याचे निर्देश शिक्षण निरीक्षकांना देण्यात असल्याची माहिती शिक्षक सेनेचे कार्याध्यक्ष जालिंदर सरोदे यांनी दिली.
मागील काही महिन्यांमध्ये समायोजन मुंबईबाहेर रायगड, ठाणे, पालघर या अतिशय दुर्गम भागांमध्ये केले जात होते. त्यामुळे अनेक महिला आणि सेवानिवृत्ती हाेणाऱ्या शिक्षकांना रोज चार ते पाच तासांचा प्रवास करून कामावर जाणे अवघड हाेत हाेते. परिणामी, त्यांचे पगार शिक्षण विभागाने थांबवले आणि गेल्या तीन महिन्यांपासून अनेक शिक्षक आर्थिक अडचणीत सापडले. या पार्श्वभूमीवर शिक्षक आमदार ज. मो. अभ्यंकर यांनी शालेय शिक्षणमंत्री दादा भुसे यांच्याकडे पाठपुरावा केला होता. विधान परिषदेतही या विषयावर मुद्दा उपस्थित करण्यात आला, त्याची दखल घेत विभागाने समायोजनाचे आदेश जारी केले. यामुळे असंख्य शिक्षकांना दिलासा मिळाला.