येरवडा कारागृहातून फरार आरोपी उल्हासनगर पोलिसांच्या जाळ्यात

येरवडा कारागृहातून फरार आरोपी
उल्हासनगर पोलिसांच्या जाळ्यात
उल्हासनगर, ता. १८ (वार्ताहर) : पुण्याच्या येरवडा मध्यवर्ती कारागृहातून पसार झालेला जन्मठेपेचा कैदी उल्हासनगर पोलिसांच्या जाळ्यात अडकला आहे. उल्हासनगर गुन्हे प्रकटीकरण पथकाने एका चोरीच्या दुचाकीच्या तपासादरम्यान मिळालेल्या माहितीवरून ही कारवाई करत, फरार आरोपी अनिल मेघदास पटेनिया (वय २८) याला गुरुवारी (ता. १७) अटक करण्यात आली.
उल्हासनगर पोलिस ठाण्यात १६ जुलै रोजी दुचाकी चोरीचा गुन्हा दाखल झाला होता. वरिष्ठ अधिकाऱ्यांच्या मार्गदर्शनाखाली गुन्हे प्रकटीकरण पथकाने तपास सुरू केला. गुप्त बातमीदारांकडून मिळालेल्या माहितीनुसार, दुर्गामाता नगर, खेमानी (कॅम्प १) परिसरात एक व्यक्ती चोरीच्या ॲक्टिव्हा दुचाकीसह फिरत असल्याची माहिती मिळाली. पोलिसांनी सापळा रचून संशयित अनिल पटेनिया याला ताब्यात घेतले. चौकशीदरम्यान त्याने दुचाकी चोरीची कबुली दिली. तसेच टिटवाळा येथे दाखल असलेल्या हत्या प्रकरणात जन्मठेपेची शिक्षा भोगत असल्याचे आणि येरवडा कारागृहातील ओपन जेलमधून पळून आल्याचेही त्याने सांगितले. त्याच्याविरुद्ध येरवडा पोलिस ठाण्यात गुन्हा दाखल असल्याची माहितीही समोर आली. माहितीची खातरजमा होताच पोलिसांनी तत्काळ पटेनियाला अटक केली.