शेजारणीला शेजारणीने दगडाने मारून केले जखमी

जाब विचारला म्हणून शेजारणीला मारहाण
भिवंडी, ता. १८ (वार्ताहर) : मुलाला मारहाण केल्याचा जाब विचारणाऱ्या महिलेला दुसऱ्या शेजारी राहणाऱ्या महिलेने शिवीगाळ करून दगडाने मारून गंभीर जखमी केले. याप्रकरणी दगडाने मारहाण करणाऱ्या शेजारणीच्या विरोधात गुरुवारी (ता. १७) कोनगाव पोलिस ठाण्यात गुन्हा दाखल करण्यात आला आहे. रंजना गायकवाड (वय ३९) असे गुन्हा दाखल झालेल्या शेजारणीचे नाव आहे. तर जयश्री लोहार (५०) असे जखमी शेजारणीचे नाव आहे.
रंजना आणि जयश्री कोनगाव येथील युनियन बँकेसमोरील अनुसया अपार्टमेंटमध्ये एकमेकांचे शेजारी आहेत. दरम्यान, गुरुवारी (ता. १७) रात्री आठ वाजण्याच्या सुमारास रंजना आणि जयश्री यांचा मुलगा ओंकेश यांच्यात भांडण झाले होते. त्या वेळी ओंकेशने त्याची आई जयश्रीला बोलावून घेतले असता त्यांनी तिच्या मुलाला का मारले, असा जाब रंजनाला विचारताच मागील भांडणाचा राग मनात धरून रंजनाने जयश्रीसह तिच्या मुलाला शिवीगाळ करून खाली पडलेला दगड उचलून जयश्रीच्या डोक्यात व कानाच्या वर मारून तिला जखमी केले.