परराज्यातून येऊन घरफोडी करणारे दोन आरोपी गजाआड

परराज्यातील घरफोडी करणारे दोन आरोपी गजाआड
नवी मुंबई, ता. १८ (वार्ताहर) : परराज्यातून येऊन घरफोडी करणाऱ्या दोन आरोपींना गुरुवारी (ता. १७) वाशी पोलिसांनी अटक केली आहे. त्यांच्याकडून वाशीगाव येथील एका वाइन शॉपमधून चोरलेला नऊ लाख ३३ हजार रुपये किमतीचा मुद्देमाल जप्त करण्यात आला आहे. अटक करण्यात आलेले धर्मेशभाई जयसूक भाई शिरोया (२७) आणि रूपसिंग भैरूसिंग राजपूत (३६) हे इतर राज्यांमध्येही घरफोडीच्या गुन्ह्यांमध्ये सहभागी आहेत.
वाशी गावातील व्ही-फाय लिव्हिंग लिक्विड्स या वाइन शॉपमधून शुक्रवारी (ता. ११) १७ लाख ५७ हजार रुपयांचा ऐवज चोरीला गेला होता. सीसीटीव्ही फुटेजच्या आधारे पोलिसांनी दहिसर येथून या दोघांना ताब्यात घेतले. त्यांनी गुन्ह्याची कबुली दिल्यानंतर गुरुवारी (ता. १७) त्यांना अटक करण्यात आली. पोलिसांनी त्यांच्याकडून दारूच्या बाटल्या, गुन्ह्यात वापरलेला टेम्पो आणि हत्यारे असा नऊ लाख ३३ हजार रुपये किमतीचा मुद्देमाल जप्त केला आहे.
या गुन्ह्यातील इतर आरोपी अद्याप फरार असून पोलिस त्यांचा शोध घेत आहेत. धर्मेश शिरोया याच्यावर गुजरात, मुंबई आणि नवी मुंबईत १२ पेक्षा जास्त घरफोडीचे गुन्हे दाखल आहेत.