पोलिसांवर हल्ला करणारे आरोपी पाच महिन्यांनी ताब्यात

पोलिसांवर हल्ला करणारे आरोपी ताब्यात
भिवंडी, ता. १८ (वार्ताहर) : भिवंडीत १७ फेब्रुवारी रोजी कारवाईसाठी गेलेल्या पोलिस पथकावर धक्काबुक्की करीत दगडफेक करणाऱ्या गुन्ह्यातील मुख्य आरोपीसह त्याच्या आठ साथीदारांना गुरुवारी (ता. १७) पाच महिन्यांनी नारपोली पोलिसांनी अटक केली आहे. उमेश गायकवाड, सचिन साठे, ओम वाघमारे, शुभम परूळेकर, आशीष सरवदे, गौरव उके, परमेश्वर गायकवाड, आशीष मिश्रा ऊर्फ भय्या अशी अटक केलेल्या आरोपींची नावे आहेत. त्यांना शुक्रवारी (ता. १८) न्यायालयात हजर केले असता त्यांना चार दिवसांची पोलिस कोठडी ठोठावण्यात आली आहे.
नारपोली पोलिस ठाणे हद्दीतील वऱ्हाळदेवी नगर येथील एका पोक्सो कायद्यांतर्गत दाखल होणाऱ्या गुन्ह्यातील आरोपीबाबत माहिती घेण्यासाठी पोलिस उपनिरीक्षक आकाश पवार व पोलिस कर्मचारी सुनील शिंदे व अब्दुल तडवी हे पोलिस वाहनासह १७ फेब्रुवारी रोजी रात्री ११ वाजता गेले होते. त्या वेळी उमेश व त्याच्या २५ ते ३० साथीदारांनी पोलिस पथकास शिवीगाळ, धक्काबुक्की करीत दगडफेक केली. पोलिस वाहनाची काचही फोडली होती. याप्रकरणी दाखल गुन्ह्यातील मुख्य आरोपी उमेश गायकवाड व त्याच्या १४ साथीदारांविरोधात दाखल गुन्ह्यात आठ जण फरार होते. त्यांना गुरुवारी सायंकाळी अटक करण्यात आली.