मुंबईत अवघे २१४ खड्डे!

मुंबईत अवघे २१४ खड्डे!
महापालिकेचा ३,२३७ बुजवल्याचा दावा

मुंबईच्या रस्त्यांतील ३,२३७ खड्डे बुजविले
२१४ खड्डे शिल्लक, पालिकेचा दावा
‘पॉटहोल क्विकफिक्स’ अ‍ॅपद्वारे तक्रारीचे तत्काळ निवारण
सकाळ वृत्तसेवा
मुंबई, ता. १८ ः मुंबईत तीन हजार ४५१ खड्डे असल्याच्या तक्रारी ‘पॉटहोल क्विकफिक्स’ अ‍ॅपद्वारे प्राप्त झाल्या. त्यापैकी तीन हजार २३७ तक्रारींचे ४८ तासांच्‍या आत निवारण करण्यात आले असून आता २१४ खड्डे शिल्लक असल्याची माहिती पालिका प्रशासनाने दिली आहे; मात्र मुंबईतील रस्ते खड्डेमय झाल्याचे चित्र आहे.

सततच्या पावसामुळे मुंबई महानगरातील रस्त्यांवर होणाऱ्या खड्ड्यांची जलद गतीने दुरुस्ती करण्यासाठी पालिकेने ‘पॉटहोल क्विकफिक्स’ मोबाईल अ‍ॅप सेवा सुरू केली आहे. महानगरपालिका आयुक्‍त भूषण गगराणी यांच्‍या हस्‍ते हे मोबाईल अ‍ॅप ९ जूनपासून नागरिकांसाठी कार्यान्वित करण्यात आले आहे. गेल्या ४० दिवसांत या ‘पॉटहोल क्विकफिक्स’ अ‍ॅपवर खड्ड्यांविषयी एकूण मिळून तीन हजार ४५१ तक्रारी प्राप्‍त झाल्‍या आहेत. पैकी तीन हजार २३७ तक्रारींचे ४८ तासांच्‍या आत निवारण करण्‍यात आले आहे, तर उर्वरित २१४ तक्रारींचे निवारण करण्‍याची कार्यवाही सुरू आहे. खड्ड्यांव्‍यतिरिक्‍त इतर विभागांच्‍या ९३१ तक्रारीदेखील या अ‍ॅपवर प्राप्‍त झाल्‍या आहेत. त्‍या तक्रारी संबंधित विभागांकडे पाठविण्‍यात आल्‍या असल्याची माहिती पालिकेने दिली आहे.

तातडीने खड्डे दुरुस्तीची प्रक्रिया
अ‍ॅप्लिकेशन ओपन केल्‍यानंतर तक्रार यशस्‍वीपणे नोंदविण्‍याची प्रक्रिया केवळ पाचपेक्षा कमी क्‍लिकमध्‍ये उपलब्‍ध करून देण्‍यात आली आहे. मोबाईल अ‍ॅपद्वारे करण्यात आलेली तक्रार संबंधित विभागाकडे थेट पोहोचते आणि खड्डे दुरुस्ती प्रक्रिया तातडीने सुरू होते.
---------------------
ॲपवरील तक्रारी
- ९ जून ते १८ जुलै : ३,४५१
- बुजवलेले खड्डे : ३,२३७
- शिल्लक खड्डे - २१४
----------------