ओला-उबेर कार चालकांची भिवंडीत निदर्शने

ओला-उबेर कारचालकांची भिवंडीत निदर्शने
भिवंडी, ता. १८ (वार्ताहर) : ओला-उबेर या ऑनलाइन कार सेवा पुरविणाऱ्या कंपनीकडून कारचालकांची पिळवणूक सुरू असून याविरोधात भिवंडीत ओला-उबेर कारचालकांनी निदर्शने करीत काम न करण्याचा निर्णय घेतला आहे. शुक्रवारी (ता. १८) अवचितपाडा येथे झालेल्या या निदर्शनात सुमारे १०० कारचालक सहभागी झाले होते.
ओला-उबेर कंपनीकडून अधिक मोबदल्याचे प्रलोभन दाखवून अनेक कारचालकांची अनेक वर्षांपासून पिळवणूक सुरू केली आहे. मागील काही वर्षांपासून प्रति किलोमीटरचे दरसुद्धा न वाढवल्याने अनेक कारचालक कर्जाच्या खाईत लोटले गेले आहेत. तर बऱ्याच वेळा कंपनीकडून आपल्या कंपनीच्या कारला प्रथम प्राधान्य देऊन त्यानंतर आम्हाला भाडे दिले जात आहे. त्यामुळे अनेकांच्या धंद्यावर परिणाम झाला आहे, अशी तक्रार नौशाद अन्सारी या कारचालकाने केली आहे.
ओला-उबेर आम्हाला अवघे आठ ते नऊ किलोमीटर दर देतात; पण सरकारने रिक्षा व कारसाठी २३ रुपये मीटर दर निश्चित केला आहे. मग आमच्यावर अन्याय का, असा प्रश्न कारचालक अस्लम शेख यांनी उपस्थित केला आहे.