भूसंपादनप्रकरणी चौकशीचे आदेश

तुर्भे, ता. १९ (बातमीदार) : महाराष्‍ट्र औद्योगिक विकास मंडळाने संपादित केलेल्या जमिनीचा वापर १०० टक्के न केल्‍याने जवळपास ४०० एकर जागेवर आज झोपड्या वसल्या आहेत. त्या जागेवर झोपडपट्टी पुनर्वसन प्राधिकरणाकडून (एसआरए) प्रकल्प उभा राहणार आहे. ज्या उद्दिष्टासाठी जमीन संपादित केली होती ते उद्दिष्ट पूर्ण न केल्याने जमीन पुन्हा प्रकल्पग्रस्तांना परत करावी, अशी मागणी नवी मुंबई ओबीसी काँग्रेस जिल्हा अध्यक्ष संतोष सुतार यांनी केली होती. याप्रकरणी नियमानुसार योग्य कार्यवाही करण्याच्या सूचना कोकण विभागाच्या भूसंपादन सहाय्यक आयुक्त अंजली पवार यांनी जिल्हाधिकारी ठाणे/रायगड भूसंपादन शाखेला दिल्या आहेत.
नवी मुंबई शहरात औद्योगिक वसाहत वसवण्यासाठी स्‍थानिक शेतकऱ्यांची १९६२ मध्ये २४६९.०४ हेक्टर जमीन संपादित केली. या सर्व जमिनीवर औद्योगिक वसाहत वसवणे क्रमप्राप्त होते; मात्र एमआयडीसीने संपूर्ण जागा वापरली नसल्याने व त्या जागेचे संरक्षण न केल्‍याने झोपडपट्टी वाढली आणि याच झोपडपट्ट्यांच्या जागेवर आता एसआरएच्या माध्यमातून इमारती उभारल्या जाणार आहेत. ही जमीन मूळ प्रकल्पग्रस्तांना परत करावी, या सुतार यांच्या मागणीची दखल घेत याप्रकरणी योग्य कार्यवाहीच्या सूचना कोकण विभागाच्या भूसंपादन सहाय्यक आयुक्त अंजली पवार यांनी जिल्हाधिकारी ठाणे/रायगड भूसंपादन शाखेला दिल्या आहेत.